Москваҕа Го оонньуутугар аан дойду 41-с чөмпүйэнээтин ыытыыга тэрийэр кэмитиэт мунньаҕа буолла.
РФ Уһук Илин уонна Арктика сайдыытын миниистирэ, тэрийэр кэмитиэт бэрэссэдээтэлэ Алексей Чекунков норуоттар икки ардыларынааҕы күрэһи ыытыы күнүн-дьылын бигэргэттэ. Тэрээһин 2021 сыл бэс ыйын 3-7 күннэригэр Владивостокка ыытыллар буолла.
Алексей Чекунков бу толкуйдуур дьоҕуру сайыннарар интеллектуальнай оонньууну өйүүр уонна сайыннарар соруктаахтарын бэлиэтээтэ, кыттарга ыҥырда. Мунньахха тэрээһиҥҥэ бэлэмнэнии боппуруостара көрүлүннүлэр. Чөмпүйэнээт чэрчитинэн тэрээһини үбүлээһин, ыытыы, ону сэргэ, бэс ыйыгар тиийэ дьайар санитарнай-эпидемиологическэй ирдэбили тутуһуунан, сорох өртүн онлайн-киэбинэн ыытыахха сөбүн учуоттуур туһунан боппуруостары дьүүллэстилэр.
«Чөмпүйэнээт устуоруйатыгар аан бастаан аан дойдуттан сөбүлээн оонньооччулар кыттыахтарын сөп. Тэрээһин РФ Бэрэсидьиэнин өйөбүлүн ылла. Грааны сүүйдүбүт. Бэстибээл аан дойдуга Уһук Илин визитнэй карточкатынан буолуоҕа. Оттон кыраныыссалар сабыллар түгэннэригэр, анал схема оҥоһуллубута бигэргэннэ. Онон тэрээһин кыттыылаахтара онлайнынан да киирэн оонньуохтарын сөп буолар«, — диэн чөмпүйэтээт дириэктэрэ Михаил Емельянов эттэ.
Куйаар ситиминэн кэпсэтиигэ СӨ Ил Дархана Айсен Николаев, Приморье кыраайын губернатора Олег Кожемяко, Магадан уобалаһын губернатора Сергей Носов, Камчатка кыраайын губернатора Владимир Солодов кытыннылар.
Манна сыһыары тутан бэлиэтиир буоллахха, «Genius Extreme» Го Аан дойдутааҕы бэстибээл Бэрэсидьиэн граанын пуондун куонкуруһугар кыайыылааҕынан тахсыбыта. Бырайыак сыала — Го оонньуу холобуругар, ыччакка интеллектуальнай оонньууга моданы киллэрии. Алексей Чекунков уонна Го оонньууга РФ кэтээн көрөр сэбиэтин бэрэссэдээтэлэ Виталий Несис «100 дней до Всемирного фестиваля Го «GeniusExtreme» челлендж саҕаламмытын биллэрдилэр.
«Биһиги элбэх эрэгийиэннээх дойдубут барыта Го партиятыгар оонньуон сөп. Мин хас биирдии эрэгийиэҥҥэ саамай бастыҥ хаамыыны оҥороллоругар баҕарабын. Хаамыы тийбэт түгэнигэр, бары Владивостокка оонньуубутун ситэриэхпит«, — диэн бэлиэтиир Алексей Чекунов.
+1
+1
+1
+1
+1
+1
+1