Гидропоника ньыматынан үүннэриллэр оҕурсу

Бөлөххө киир:

Битэмииннээх диэн дьон үксэ оҕуруот аһын, фруктаны хото атыылаһар. Ол эрэн, кытайдар, атын да омуктар барыс ылаары ол астарын туох уоҕурдуунан бөскөтөллөрүн, хайдах үүннэрэн таһааралларын, аны буортуйбатын диэн тугунан кылабачыта сотоллорун биһиги билбэппит. Бу бэҕэһээ Тулагы Сыырдааҕар төгүрүк сыл кыһыннары оҕуруот аһын үүннэрэр «Саюри» тэпилииссэ иккис уочарата аһыллан, куорат маҕаһыыннарыгар бэйэ бородууксуйата дэлэйиэхтээх.     

edersaas.ru

Оҕурсуну манна, киһи сөҕүөх, буора суох иҥэмтэлээх булкадаһыкка улахан угу кып-кыра иһиккэ гидропоника ньыматынан үүннэрэллэр. Онон урукку курдук сыыс оту үргээһин оҥоһуллубат, биэдэрэнэн уу кутуллубат.

Тэпилииссэҕэ үс хос халыҥнаах дьоппуон бүрүөһүнүн тутталлар, бу пленка сырдыгы 94% аһарар, онон өстүөкүлэтээҕэр ордук. Тэпилииссэ иһинээҕи эйгэни, үүнээйигэ таммаҕынан уу кутууну автоматика быһыытынан киин көмпүүтэр салайар.

Билиҥҥитэ манна оҕурсу, помидор, салаат сэбирдэҕин үүннэрэллэр. Салаат маҕаһыыҥҥа сытан саһарбатын, куурбатын-хаппатын диэн угун кыра буордаах иһит иһигэр уган атыылыыллар. Инникитин тыа хаһаайыстыбатын бородууксуйатын көрүҥүн кэҥэтэн, петрушка, укроп, базилик үүннэрэр санаалаахтар.

«Өссө соторутааҕыта эрэ төгүрүк сыл үлэлиир тэпилииссэ тула элбэх мөккүөр тахсар этэ, ол эрэн, күн бүгүн бырайыак олоххо киирэн, үлэлии турарын көрөбүт. Бу агрокластер Дьокуускай куорат олохтоохторун дьыл хайа баҕарар кэмигэр сибиэһэй помидорунан, оҕурсунан, салаат сэбирдэҕинэн хааччыйыа, ордук кыһыҥҥы кэмҥэ. Роспотребнадзор чинчийиитинэн, маннааҕы тэпилииссэҕэ үүннэриллибит оҕуруот аһыгар кэлии бородууксуйатааҕар нитрат уоҕурдуутун таһыма быдан кыра», — диэн бэлиэтиир Ил Дархан Айсен Николаев.

Онон кэлии оҕуруот аһынааҕар бэйэ оҕурсута амтана да үчүгэйэ оҕо сылдьан сиирбитин санатарга дылы.

Марианна Тыртыкова, «Саха сирэ», edersaas.ru

+1
0
+1
0
+1
0
+1
0
+1
0
+1
0
+1
0