Бу күннэргэ бассаабынан «икки куул эттээх суоппары ГИБДД-лар туппуттар, массыынатын отделга илдьэн туруорбуттар» диэн ис хоһоонноох иһитиннэрии тарҕаммыта. Биллэн турар, анонимнай — кими-тугу, хаһан-ханна туппуттара, күнэ-дьыла, ааттара-суоллара ыйыллыбатах. ГИБДД иниспиэктэрдэрэ итинник былдьыыр бырааптаахтар дуо? Ону биһиги бу матырыйаалбытыттан билиэххит.
Бастаан ол бассаап иһитиннэриитигэр суруллубуту хайдах баарынан тиэрдэбин: «Икки куул сүөһү эттээх айаннаан иһэр суоппары гаилар туппуттар, справкаҥ суох диэннэр, ону дьоммор кэһиим диэн этэ сатаабыт да ылымматахтар, ылан массыынатын отделга илдьэн тоҥорон туруоран кэбиспиттэр массыыналыын баҕастыын, ол аата маҕаһыынтан пакет да эттээх боллаххына былдьаан ылар болбуттар, ветсправкаҥ суох диэннэр».
ГИБДД иниспиэктэрдэрэ дьон тиэйэн иһэр этин итинник бэрэбиэркэлиир, былдьаан ылар бырааптаахтар дуо? Ону биһиги СӨ ИДьМ-тын ГИБДД пропагандаҕа отделыттан комментарий биэрэллэригэр көрдөстүбүт.
Лена Чемезова, СӨ ИДьМ-тын ГИБДД пропагандаҕа отделын начальнигын солбуйааччы, полиция подполковнига:
— Эти бэйэ туттарыгар таһыыга докумуоннар ирдэммэттэр. Маныаха Россельхознадзор быһаарыытынан, бэйэ туттарга анаммыт эт төһө элбэх буолуохтааҕа ыйыллыбат (холобур, бүтүн КамАЗ эт төһө да улахан дьиэ кэргэҥҥэ олус элбэх буолара өйдөнөр).
Ол эрэн, Россельхознадзор бэлиэтииринэн, атыыга анаммыт эт хайаан да докумуоннардаах буолуохтаах, ол иһигэр, бэтэринээрдэртэн эмиэ.
Маныаха бэлиэтээн эттэххэ, өрөспүүбүлүкэ үрдүнэн идэһэ өлөрүүтэ буола турарынан, эти уоруу түбэлтэлэрэ тахсыталыыллар. Итинэн сибээстээн, ирдэбил быһыытынан, полиция үлэһиттэрэ эти таһыыны кытаанахтык хонтуруоллууллар.
Онон, өскөтүн эти тиэйэн иһиигэ туох эмит уорбалааһын, саарбаҕалааһын үөскээтэҕинэ, полицейскайдар бэрэбиэркэ ыытар, тиэйэн иһэр киһини отделга илдьэр бырааптаахтар. Маныаха көҥүлэ суох былдьааһын оҥоһуллубат.
Ити хоруйтан өйдөөбүккүт курдук, полиция үлэһиттэрэ эти уорууну сэрэтиигэ, уоруллубут эти булууга, уоруйаҕы тутууга туһуламмыт ирдэбиллэринэн салайтараллар.
Түгэнинэн туһанан, эти уоруу хас да түбэлтэтин санатабын, ол чахчылар биһиги сайтпытыгар суруллубуттара.
Ол курдук, сэтинньи 13 күнүгэр Сунтаар сэлиэнньэтигэр кыһыҥҥы өттүгэр кураанах турар дьиэттэн 35 киилэ ынах этин уорбуттара. 18 тыһ. солк. суумалаах хоромньу тахсыбыта. Уоруйахтар дьиэ күүлэтин аанын устан ылан киирбиттэр этэ.
Төҥүлү сэлиэнньэтин биир олохтооҕун хоспоҕуттан түүн 70 киилэ ынаҕын этэ сүппүт этэ. Уоруйах ол киһи дьиэтин аттынан ааһан иһэн, хоспоххо ынах этэ кыстанан сытарын көрөн, түүн анаан-минээн тиийэн, хатааһына суох хоспохтон эттэрин сүгэн илдьэ барбыт этэ.
Онтон Нам улууһугар биир пенсионертан уоруйах киэһэ 22.00 чаас саҕана дьиэ күүлэтин аанын алдьатан киирэн, 15 киилэ сибиинньэ этин ылан барбыта. Дьиэлээхтэр кытаанахтык утуйа сытар буолан, туох да тыаһы-ууһу истибэтэхтэр, сүтүктэрин сарсыныгар биирдэ өйдөөн көрбүттэр этэ.
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн