Успуорт

Үгэскэ киирбит эстэпиэтэ көхтөөхтүк ааста

Сааскы кэм барахсан сандаархай сардаҥалара киһи аймахха сырдыкка-ырааска, уһуктууга, тиллиигэ-тыллыыга угуйар, ыҥырар.
Бу күннэргэ Хатаспытыгар олох араас хайысхатыгар хамсаныы-имсэнии, сэргэхсийии, кэлии-барыы, ыраастаныы буола турар. Дьиэҕэ чуҥкуйан олорооччу тарбахха баттанар. Ким кэмпэриэнсийэҕэ кыттар, ким сүлүөккэ сылдьар, ким үйэтитиигэ үлэлиир, ким үрүҥ илгэни үрүлүтэр, ким сааскы булт умсулҕаныгар ылларар, ким ыраастаныы үлэтин тэрийэр… Олоруохха, оҥоруохха, айыахха-тутуохха үчүгэй да кэм!

edersaas.ru


Муус устар 7 күнүгэр үгэскэ киирбит күүтүүлээх эстэпиэтэ буолан ааста. Аҥаардас кыттааччыта — 42 спортсмен, ону таhынан тэрийээччилэр, көрөөччүлэр, ыалдьааччылар. Эстэпиэтэни тэрийэр хамыыһыйаҕа Саввинов Эдуард Николаевич, Игнатьев Семен Семенович, Саввин Андрей Андреевич, Соловьев Артур Данилович бааллар. Быһа холоон 100-чэкэ киһи баар.
Ханнык баҕарар тэрилтэ салайааччыта тус бэйэтинэн холобур буолара хаһан баҕарар кэпсэлгэ, кэрэхсэбилгэ сылдьар. Бэлиэтиир эбит буоллахха, салайааччылартан Хатаспыт дьаһалтатын салайааччыта Пермяков Евгений Петрович, «Сахатранснефтегаз» УГРС Хатастааҕы учаастагын начаалынньыга Васильев Николай Николаевич, Хатас участактааҕы балыыһатын сэбиэдиссэйэ Брусенина Елена Семеновна бааллара кинилэргэ убаастабылы үөскэтэр.


Түмүккэ 1 миэстэни Дьокуускай куоракка үлэлиир дьоммут хамаандата (Сивцев Павел Андреевич, Кондратьева Татьяна Иннокентьевна, Саввин Гаврил Михайлович, Иванова Анна Петровна, Чичигинаров Афанасий, Сивцева Анисия Павловна) ылла. Дьэ, көрөрбүт курдук, күүстээх хамаанда. Кэрэхсэбиллээҕэ ийэ оҕотунаан бааллар – Анисия Павловна уола Павеллыын сүүрдүлэр. Павел кыра эрдэҕиттэн успуорт эйгэтигэр (хайыһарга) кэккэ улахан ситиһиилэрдээҕин көрө-истэ үөрээччибит. Гаврил Михайловиһы этэ да барбаппыт, куруутун олох үөһүгэр сылдьарын билэбит. Татьяна Иннокентьевна удьуор чөл-чэгиэн туруктаах Кондратьевтар сыдьааннара, Анна Петровна мэлдьи эйэҕэс-сайаҕас киһи, үҥкүү диэтэххэ үҥкүү, сүүрүү диэтэххэ сүүрүү. Афанасий Чичигинаров дьиэ-кэргэнинэн волейбол диэн муннукка ытаабыт дьоннор. Хатаспыт чиэһин дьиэ-кэргэнинэн «Ийэм, аҕам уонна мин» күрэххэ доргуччу ааттаппыт дьон.


Иккис миэстэни Самсоновтар ааттарынан Хатас орто оскуолатын хамаандата (Оконешников Егор Алексеевич, Николаева Анастасия Егоровна, Окороков Михаил Спартакович, Антонова Алена Викторовна, Антонов Александр Львович, Моисеева Людмила Васильевна) ылла. Манна даҕаны хамаанда хас биирдии чилиэнэ, этэргэ дылы, бэйэтэ туһугар дьоруой дьон буоллаҕа. Удьуор кытыгырас Антоновтар, көлүөнэ ситимэ Борисовтар (Моисеева), эргиччи, дэгиттэр ыаллар Окороковтар, сыл бастыҥ кылаас салайааччыта Оконешников.
Үһүс бириистээх миэстэ №70 «Кэрэчээнэ» МУП ПТСК кыттыгас хамаандалара (Афонина Татьяна Сергеевна, Иванова Сахая Сергеевна, Тарабукин Спартак Иннокентьевич, Тихонов Василий Васильевич, Петров Семен Борисович, Корнилова Александра Петровна) тигистэ. Эмиэ бэртээхэй састаап. Бу дьон хас биирдиилэрэ Хатас аатын араас таһымнаах күрэхтэргэ чиэстээхтик көмүскээбитэ.
4 миэстэҕэ — дьаһалта, «Прогресс», «Ыраас уу», 5 миэстэҕэ — ДЮСШ, ДШИ, «Ситим» ДТ, 6 миэстэҕэ — «Сахатранснефтегаз», 7 миэстэҕэ «Тускул» Култуура киинэ, баһаарынай чаас, 8 миэстэҕэ бибилэтиэкэ тигистилэр.


Кыайыылаахтары наҕараадалааһын үөрүүлээх түгэнтэн саҕаланна. Ол курдук, оскуола эрдэҕиттэн төрөөбүт нэһилиэгин сайдарын-үүнэрин туһугар, ыччат дьон хамсааһыныгар куруук көхтөөхтүк кыттар Саввин Андрей Андреевичка Дьокуускай куорат дьаһалтата «Дьокуускай куоракка ыччат бэлиитикэтин сайдыытыгар кылаатын иһин» диэн түөскэ кэтэр бэлиэ туттарда. Наҕараада бэйэтин дьоруойун булла. Кыайыылаах хамаандалар мэтээлинэн, грамоталарынан наҕараадаланнылар.
Түмүккэ бүгүн дьиэтээҕи да үлэ да түбүгүн, булт-алт умсулҕанын, араас элбэх атын тэрээһиннэри тохтотон туран, нэһилиэк дьонун-сэргэтин кытта бииргэ буолан чөл, чэгиэн олох , күөн күрэс тыыныгар киирбит дьоммутугар махталбытын биллэрэбит.


Ол кэннэ бары тутуспутунан биһиги билиҥҥи олохпут эйэлээх халлаан анныгар буоларын иһин, кыргыһыы хонуутугар охтубут хорсун буойуттарга сүгүрүйүү бэлиэтин — чүмэчини уматыы сиэригэр-туомугар кытыннылар. «Тускул» КК тэрээһин дириҥ суолтатын муусука, тыл-өс көмөтүнэн тириэртэ.

«Саха сирэ», edersaas.ru анаан Наталья РУФОВА

 

0
0
Telegram @edersaas20