2021 сыл Мэҥэ Хаҥаласка Герой сылынан биллэриллибитэ.
Сахалартан бастакы Сэбиэскэй Сойуус Геройа Ф.К.Попов бу сыл ахсынньытыгар төрөөбүтэ 100 сылын туолуохтаах. Герой Попов Днепр өрүһү туоруурга оҥорбут холобура суох хорсун быһыыта ырыаҕа ылланар, хоһооҥҥо хоһуллар. Мэҥэлэр чулуу уолларын сырдык аатын үйэтитиигэ, кини 100 сыллаах үбүлүөйүн бэлиэтээһиҥҥэ киэҥ далааһыннаах үлэлэрин саҕалаабыттара номнуо түөрт ый буолла. Герой сыла үөрүүлээхтик аһыллыыта, Аллараа Бэстээхтэн дьоруой төрөөбүт дойдутугар, Сыымахха, хайыһардаах уолаттар «Хаардаах десаннара» үрдүк тэрээһиннээхтик ыытыллыбыттара. Үгэс быһыытынан ыытыллар култуура уонна успуорт эстэпиэтэтэ эмиэ Герой Поповка ананан бара турар. Улуус нэһилиэктэринэн Герой Сулуһа айанныыр.
Биһиги, Баатараттан тахсыбыт үгүс көлүөнэ дьон, Герой Попов аатын сүгэр, кини үөрэммит оскуолатыгар үөрэммиппитинэн дьоллоохпут, онон муҥура суох киэн туттабыт.
Мин бэһис кылааска үөрэнэр сылбар Герой паартатыгар олорон үөрэммитим. Бу наһаа долгутуулаах уонна эппиэтинэстээх этэ! Хас сарсыарда аайы уруок саҕаланарыгар дьуһуурунай оҕо арааппардыыр: «Герой Советского Союза Ф.К.Попов погиб смертью храбрых в Великой Отечественной войне!». Ити кэмҥэ уу — чуумпу буолара, сүрэхпит тэбиитэ тохтоон ылар курдуга… Бэйэм көлүөнэм туһунан тус санаам маннык: биһиги Герой оскуолатыгар үөрэнэммит, барыга болҕомтолоох сыһыаннаах, үрдүк эппиэтинэстээх, олоххо, уопсастыбаннай үлэҕэ көхтөөх, дойдуга, норуокка бэриниилээх буола улааппыппыт.
Аны кыһын ахсынньы ый аҕыс күнүгэр төрөөбүт оскуолабыт уонна Герой убайбыт Фёдор Попов 100 сылларын бэлиэтиир өрөгөйдөөх үбүлүөйгэ “Сүөдэри солбуйан, Сүөдэрдии сүрэхтээх сүүһүнэн ыччаттар”көрсүөхпүт, “Баатарабытын” ыллыахпыт!
Елена Прокопьева, РФ суруналыыстарын сойууһун чилиэнэ,
уопсастыбаннай кэрэспэдьиэн.
Хаартыскаҕа: Е.Прокопьева (ааптар тиксэриитэ)