Быйыл өрөспүүбүлүкэ 100 ыала дьиэ кэргэҥҥэ үйэлээх таптал күнүгэр «Эрэллээх уонна үйэлээх таптал» мэтээлинэн наҕараадаланнылар.
edersaas.ru
Кинилэр ортолоругар Тымныы полюһа — Өймөкөөн улууһуттан Сордоҥноох нэһилиэгин олохтоохторо Александр уонна Оксана Гермогеновтар бааллар.
Улуус баһылыга Иннокентий Сивцев дьиэ кэргэннэри социальнай ситимнэринэн эҕэрдэлииригэр 34 сыл бииргэ олорбут Гермогеновтар иллээх дьиэ кэргэттэрэ улуус олохтоохторугар элбэх оҕолоох дьиэ кэргэн быһыытынан биллэллэлэрин, биэс уолаттарын үлэнэн ииппиттэрин холобурдаата.
Ыал аҕата Александр Гермогенов 1984 сыллаахха оскуоланы бүтэрээт, үлэтин төрөөбүт нэһилиэгэр отделение биригэдьииринэн саҕалаабыта. Кэргэнэ Оксана идэтинэн алын сүһүөх кылаас учуутала. Ньурба Чаппандатын кыыһа үөрэҕин бүтэрээт, Сордоҥнооххо ананан кэлбитэ. 1986 сыллаахха эдэр дьон дьоллорун холбообуттара.
Билигин Гермогеновтар — биэс уол оҕо тапталлаах төрөппүттэрэ. Улахан уол Алексей үрдүк үөрэхтээх, төрөөбүт нэһилиэгэр төннөн кэлэн, ДЭС начаалынньыгынан үлэлиир. Иккис уол Никифор эмиэ дойдутугар төннөн кэлэн, үөрэммит оскуолатыгар физкультура уонна ОБЖ учуутала. Үһүс уол Александр улуус киинигэр Уус-Ньараҕа суол тутуутугар сыбаарсыктыыр. Төрдүс уол Яков соторутааҕыта аармыйаттан сулууспалаан кэлэн, эмиэ улуус киинигэр убайын кытта суол тутуутугар үлэлээн эрэр. Кыра уол Юрий — Сордоҥноох орто оскуолатын 9-с кылааһын үөрэнээччитэ. Уолаттара бары дойдуларыгар төннөн кэлэн, төрөөбүт Өймөкөөннөрүн социальнай-экэнэмиичэскэй сайдыытыгар кылааттарын киллэрэ сылдьалларыттан төрөппүттэрэ олуһун киэн тутталлар.
Бүгүн нэһилиэк баһылыга Иван Максимов Гермогеновтарга суолталаах наҕарааданы туттарда.
Иван Егорович элбэх оҕолоох иллээх дьиэ кэргэни нэһилиэк уопсастыбаннай олоҕор олус көхтөөх ыал, оҕолуун, төрөппүттүүн бары актыыбынай дьон диэн бэлиэтиир.
Өймөкөөн улууһун олохтоохторо Сордоҥноох Гермогеновтарын «Эрэллээх уонна үйэлээх таптал» мэтээлинэн наҕараадаламмыттарынан истиҥ эҕэдэлэрин тиэртилэр.
Елена ПОТОЦКАЯ, «Саха сирэ» хаһыат, edersaas.ru