Германияҕа Сэбиэскэй саллаакка анаммыт элбэх пааматынньык, кэриэстэбил бэлиэлэр туруоруллубуттара.
edersaas.ru
Саха АССР үтүөлээх геолога, сир баайын чинчийии туйгуна, геолого-минералогическай наука хандьытаата, “Ытык Сүбэ” чилиэнэ, Ньурба улууһун бочуоттаах олохтооҕо Георгий Дмитриевич Балакшин быйыл, тохсунньу ыйга Германияҕа сылдьан, Сэбиэскэй саллаакка анаммыт пааматынньыктары түһэрбит хаартыскаларын таһаарабыт.
Георгий Дмитриевич сэрии аҕаланыытыгар аҕыс саастаах уолчаан этэ. Аҕата сэрии иннинэ өлөн, ийэлэрэ Александра Николаевна Балакшина 6 оҕотун сэрии ыар сылларыгар соҕотоҕун атахтарыгар туруорбута. Александра Николаевна улахан уола Дмитрий Балакшин сэриигэ баҕа өттүнэн баран, “За боевые заслуги”, “За оборону Сталинграда”, “За взятие Кенинсберга”, “За взятие Берлина” наҕараадалардаах дойдутугар Ньурбаҕа 1945 сыллаахха эргиллэн кэлбитэ.
Георгий Дмитриевич олоҕун биир ураты түгэнин, 1953 сыллаахха, Москва куоракка устудьуоннуу сылдьан, Сталин бохоруонатыгар сылдьыбытын “Саха сирэ” хаһыакка маннык кэпсээн турар:
“1953 сыллаахха 20-с нүөмэрдээх аудиторияҕа институт устудьуоннарын мунньан, Сталин өлбүтүн туһунан иһитиннэрдилэр. Бары – саха, нуучча, поляк, румын омугуттан тутулга суох ытаабыппытын өйдүүбүн. Сталин бохоруонатын күн үс уол буолан сарсыарда эрдэ туран бардыбыт. Уулусса тобус-толору киһи этэ. Биир хаамыыны да сатаан оҥорбоппут. Дьон ханна илдьэринэн үтүрүллэн хааман, оннооҕор Пушкин уулуссатыгар турар дьиэ кыбартыыратын иһинэн ааһан, түннүгүнэн ыстанан тахсыбыппыт. Дьон наһаа элбэх буолан эчэйии элбэх этэ. Мин дьон үтүрүйэн, суолу бүөлээн турар грузовой массыыналарга көхсүбүн өлөрбүтүм. Ол күн ыарыытын олох билбэтэҕим. Сарсыныгар ороммуттан сатаан турбакка, табаарыстарым суһал көмөнү ыҥыран, балыыһаҕа биир нэдиэлэ сытан эмтэммитим. Колоннай саал болуоссатыгар чугаһаабыппытыгар аттаах милииссийэ суолу сабан турара. Ат туйаҕа сирэйим иннигэр элэҥнээбитэ билигин да харахпар көстөр. Ол да буоллар Сталин сытар хоруобар тиийбиппит. Бокулуон оҥорбуппутун, Хрущев, Малинин туралларын өйдүүбүн”.
Ньургуйаана Иванова, “Саха сирэ” хаһыат, edersaas.ru
Хаартыскалар Георгий Дмитриевич Балакшин тус түһэриилэрэ.