Георгий Михайлов Донбасстан тэскилээччилэргэ хомуллар көмө пуунугар сырытта

Донецкай уонна Луганскай норуодунай өрөспүүбүлүкэлэртэн тэскилээччилэргэ гуманитарнай көмөнү хомуйар пууҥҥа Саха сирин олохтоохторуттан номнуо бастакы көмөлөр киирэн эрэллэр.

СӨ Ил Дарханын уонна СӨ Бырабыыталыстыбатын дьаһалтатын салайааччы Георгий Михайлов уонна кини солбуйааччыта Михаил Гасанбалаев тустаах пууҥҥа сырыттылар. Бу кэмҥэ пууҥҥа дьуһуурустубаҕа Саха сирин уопсастыбаннай палаататын бэрэссэдээтэлэ Николай Бугаев баара.

Георгий Михайлов бэлиэтииринэн, хоту аламаҕай, алдьархайга түбэспиттэргэ туох ирдэнэринэн көмөлөһөр  дьон олорор. 2014 сыллаахха Саха сиригэр Донбасстан бастакы тэскилээччилэр кэлбиттэригэр олохтоох нэһилиэнньэ тута өйөөбүтэ уонна көмөнү эрэйэр дьоҥҥо хомуйбутунан барбыта. Билигин даҕаны оннук – маҥнай утаа туттуллар маллары аҕалан эрэллэр. Бастатан туран, оҕо памперстарын, аһылыгы, таҥаһы, ону тэҥэ, оскуола алын саастаах оҕолоругар аналлаах кинигэлэри биэрдилэр.

Донецкай уонна Луганскай норуодунай өрөспүүбүлүкэлэртэн тэскилээччилэргэ гуманитарнай көмөнү тутуу туһунан быһаарыыны СӨ уопсастыбаннай палаататын сэбиэтин уочарата суох мунньаҕар, 2022 сыл олунньу 20 күнүгэр ылыммыттара. Тэрийээччилэр – СӨ Уопсастыбаннай палаатата #Мывместе Бүтүн Арассыыйатааҕы аахсыйа ыстааба.

Пуун үлэһиттэрэ маннык усулуобуйаны туруорбуттар: мал барыта саҥа, хаатыгар угулла сылдьар, этикеткалаах, туспа хоруопкаларга угуллубут буолуохтаах.  Тэскилээччилэр кэлэр түгэннэригэр, көмөнү араартаан түҥэтэлиэхтэрэ. Өскөтүн Донбасс олохтоохторо манна тиийэн кэлбэт түгэннэригэр гуманитарнай хоруопакалары Ростов уобалаһыгар ыытыахпыт.

Николай Бугаев кэллиэгэтин, Ростов уобалаһын уопсастыбаннай палаататын бэрэссэдээтэлин Вячеслав Кущевы кытта тиһигин быспакка сибээстэһэр. Вячеслав Митрофанович уобалас тэскилээччилэри көрсүүтүн уонна олохтооһунун,  кинилэргэ туох ирдэнэрин туһунан билиһиннэрэ турар.

Хомуур пуунун эппиэтинэстээх үлэһитинэн Уопсастыбаннай палаата кэммиэрчэскэйэ суох секторы, үтүөнү оҥорууну, омуктар икки ардыларынааҕы уонна религиялар икки ардыларынааҕы сыһыаннаһыыны олохтууру (гармонизация) сайыннарар хамыыһыйа бэрэссэдээтэлэ, Арассыыйатааҕы Кыһыл Кириэс Саха сиринээҕи салаатын эрэгийиэннээҕи координатора Алена Кычкина анаммыт.

Малы-салы, таҥаһы-сабы уонна бородууктаны маннык аадырыска ылаллар: Дьокуускай куорат, Орджоникидзе уул. 10-с нүөмэрдээх дьиэтэ, 2-с этээс, аактабай саала (Ресурсный центр добровольчества Якутии).

Үлэлиир кэмэ: күннэтэ 10:00 – 20:00 чаас. Координатордары кытта барыллаан кэпсэтэн баран атын да бириэмэҕэ аҕалыаххытын сөп.

Ыстаабы кытта билсэр нүөмэргит: +74112-50-88-93, +74112-50-88-92.

СӨ Уопсастыбаннай палаататын саайтыттан