Бу күннэргэ Сахабыт сиригэр ССРС үтүөлээх тириэньэрэ Георгий Бураков ыалдьыттаата. Саха тустууну сэҥээрээччилэрэ ытыктыыр киһилэрэ Киев курдук ыраах сиртэн анаан-минээн кэлэн иитиллээччитин — олимпийскай чөмпүйүөн Павел Пинигини 65 сааһынан эҕэрдэлээтэ, Чурапчынан, Дьокуускайынан ыытыллыбыт үбүлүөйдээх тэрээһиннэргэ кытынна, Николай Тарскай кэриэһигэр көҥүл тустууга өрөспүүбүлүкэ чөмпүйэнээтигэр, “Саха сирин тимир суоллара” хампаанньа бирииһигэр кыра уонна орто саастаах уолаттар ортолоругар норуоттар икки ардыларынааҕы турнирга бочуоттаах ыалдьытынан буолла.
“Триумф” Спорт киинигэр ыытыллыбыт эдэрдэр түһүлгэлэригэр быыс булан, күрэхтэһии туһунан санаатын үллэстэригэр көрдөспүппэр, “Оҕолорго чахчы улахан бырааһынньык буолла, чопчу тугу эмэ этэр эрдэ дии саныыбын, ситэ чочулла иликтэр, оскуолалара көстүбэт – кыралара бэрт”, — диэтэ. Уонна бэйэлэрэ да аҕыйах биллиилээх бөҕөстөрбүт тириэньэринэн үлэлээбэттэрин бэлиэтии көрбүтүн, онтон хомойорун эттэ.
Атын өрөспүүбүлүкэлэргэ улахан спортан тохтообут ааттаах-суоллаах тустууктар тириэньэр үлэтигэр көһөллөрүн, көбүөргэ көмүс көлөһүннэрин тоҕон туран ылбыт баай уопуттарын, билиилэрин, үөрүйэхтэрин эдэрдэргэ тиэрдэллэрин холобур аҕалан туран, арай эрэ Саха сиригэр оннук буолбатах эбит диэтэ. Аныгы кэмҥэ, аҥардас институттарга ылбыт билиигинэн ырааппаккын, кэнэҕэски Европа, аан дойду, Олимпийскай оонньуулар чөмпүйүөннэрин кыайан ииппэккин эттэ.
Георгий Анатольевич бастыҥ уопуту бастыҥ толорооччулар эрэ биэрэр кыахтаахтар диэн туран, билигин манна оҕолору кытта үлэлэһэ сылдьар дьон, чулуу бөҕөстөр эрчиллэр ньымаларын уу харахтарынан көрбөтөх, улахан түһүлгэ тыынын эттэринэн-хааннарынан билбэтэх буоланнар, баар балаһыанньаны өйдөөбөттөрүн, аан дойдуга тустуу хайа суолунан сайдыаҕын ыраҥалыыр кыахтара суоҕун эттэ, онтон ити, бастатан туран, саха тустуутун сайдыытыгар охсуулааҕын ыйда.
Киһи эрэ барыта тириэньэр буолбатын өйдүүбүн, ол эрээри ситиһиилээх бөҕөстөргүт тоҕо бары дириэктэр, завуч үлэтигэр тардысталларын, көбүөртэн тэйэ тутталларын өйүм хоппот диэтэ уонна итини хайдах быһаарары билбэппин диэн билиннэ. Баҕар, ити тириэньэр үлэтэ ситэ сыаналамматыттан, хамнаһа кыратыттан буолуон сөп диэн санаатын эттэ.
Тус көрүүтүн урут көҥүл тустууга ССРС сүүмэрдэммит хамаандатын аан дойду чөмпүйүөнэ Юрий Шахмурадов, Олимпиада икки төгүллээх чөмпүйүөнэ Иван Ярыгин ситиһиилээхтик салайбыттарынан ытаһалаан биэрдэ. Олимпийскай оонньуулар үс төгүллээх кыайыылаахтара Александр Медведь тустуу өрөспүүбүлүкэтээҕи федерациятын салайааччытын дуоһунаһыттан аккаастанан, аҕыс уон сааһыгар билигин Минскэйгэ оҕо тириэньэринэн үлэлииринэн холобурдаата.
Ыспыраапка
Георгий Анатольевич Бураков – ССРС уонна Украина үтүөлээх тириэньэрэ, көҥүл тустууга норуоттар икки ардыларынааҕы кылаастаах спорт маастара. ССРС Сэбилэниилээх Күүстэрин чөмпүйүөнэ, Доҕордуу аармыйалар турнирадарын кыайыылааҕа, Украинскай ССР элбэх төгүллээх чөмпүйүөнэ, ССРС Кубогын призера.
Георгий Анатольевич элбэх биллиилээх бөҕөстөрү иитэн таһаарбыта. Кини иитиллээччилэрэ Павел Пинигин (Монреаль, 1976) уонна Эльбрус Тедеев (Афины, 2004) Олимпийскай оонньуулар чөмпүйүөннэринэн буолбуттара.
Хаартыскаҕа: ССРС үтүөлээх тириэньэрэ Георгий Бураков олимпийскай чөмпүйүөн Павел Пинигини кытта.
Роман Попов, edersaas.ru
Хаартыска Интэриниэттэн ылылынна.