Бу күннэргэ Ил Дархан Айсен Николаев уонна “Росгеология” АУо Бырабылыанньатын салайааччыта Сергей Горьков Саха сиригэр геологическай-чинчийэр үлэ кэскиллээхтик сайдыытын дьүүллэстилэр.
edersaas.ru
Суолталаах мунньахха дойдуга уонна өрөспүүбүлүкэҕэ сир баайын хостуур тэрилтэлэр салайааччылара кыттыыны ыллылар.
— Геологическай чинчийии сайдыытыгар олус суолталаах тэрээһиҥҥэ Саха сиригэр араас хайысханан сир хостооһунугар (алмаас, нефть, көмүс, алтан, чох) үлэлиир бөдөҥ тэрилтэлэр быһаарыыны эрэйэр боппуруостары ырыттылар. Кэлиҥҥи кэмҥэ геологическай чинчийиини сүрүннээһин мөлтөөбүтэ көстөр. Онон бырабыытылыстыба манна болҕомтотун уурара эрэйиллэр. Маны таһынан, федеральнай уонна өрөспүүбүлүкэтээҕи таһымҥа кэккэ административнай орооһуу, туорайдааһын баар. Эригийиэн бүддьүөтүгэр геологическай чинчийии эбии харчы киирэрин хааччыйар. Киэҥ ыҥырыылаах мунньахха сир баайын хостуур тэрилтэлэр тирээн турар боппуруостарын быһаарар, “Росгеологияны” кытта бииргэ үлэлээһин хайысхаларын, тосхолун тобулар инниттэн кэлим бырагырааманы оҥорор анал оробуочай бөлөх тэрилиннэ, — диэн суруналыыстарга иһитиннэрдэ Айсен Николаев.
“Росгеология” АУо Бырабылыанньатын салайааччыта Сергей Горьков суолталаах мунньаҕы көҕүлүүр соруктаах Саха сиригэр бэйэтин хамаандатын анаан илдьэ кэлбит.
— Бары хайысханан олохтоох кэпсэтии буолла. Геологическай чинчийиигэ ороскуот уонна үлэ кээмэйэ улаатыаҕа. Бииргэ үлэлээһин түмүгэр сиртэн хостонор баай суотуттан бырабыыталыстыба бүддьүөтүн үбэ хаҥыаҕа. Өрөспүүбүлүкэ салалтатын кытта тэрийбит оробуочай бөлөхпүт бастакы мунньаҕар кэскиллээх тосхолу былааннаан, геологическай чинчийии үлэтигэр, Саха сирин экэниэмикэтэ сайдыытыгар саҥа саҕах торумнаныаҕа, — диэн бэлиэтээтэ Сергей Горьков.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Анатолий Шестаков түһэриитэ.