Маны аах Уопсастыба

Геннадий Охлопков саҥа дуоһунаска ананна

Саха КВН оҕо хамсааһынын лиидэрэ Геннадий Охлопков Саха академическэй тыйаатырын дириэктэрин солбуйааччытынан ананна. Бу иннинэ Геннадий Охлопков Оҕо уопсастыбаннай «Дьулуур» хамсааһынын салайааччытынан хас да сыл ситиһиилээхтик үлэлээбитэ. Ону таһынан “Дети Севера” диэн порталы салайан үлэлэппитэ.

Биһиги таһаарыыбытын кытта Геннадий куруук ыкса үлэлэһэр. Үлэҕэ-хамнаска олус эппиэтинэстээх, өрүү саҥа идиэйэлэрдээх доҕорбутун саҥа дуоһунаска анаммытынан эҕэрдэлиибит.

Биһиги саайтпыт ааҕааччыларыгар анаан Геннадий Охлопков санаатын үллэһиннэ:

— Мин уруккуттан култуура уонна духуобунас эйгэтигэр чугаспын. Төрөөбүт тылбытын, литератураны, Саха тыйаатырын ис сүрэхпиттэн ылынарым. Ону таһынан, аныгылыы креативнай бырайыактары тэрийэргэ уопуттаахпын диэн бэлиэтиэхпин баҕарабын. Дьону кытта уопсай тылы булар уонна араас эйгэлээх уопсастыбаны кытта алтыһыы үлэбэр өрүү төһүү күүс буолааччы. Мин Саха тыйаатырын сыанатыгар аан бастаан 2005 сыллаахха тахсыбытым. Төрөөбүт ийэ тылым учууталларын иннигэр Былатыан Ойуунускай «Омуннаах оҕо» айымньытын аахпытым. Ол күнү күн бүгүҥҥэ диэри олус иһирэхтик саныыбын, сыана кэнниттэн улуу киһибит Ойуунускай кыыһа Сардаана Платоновналыын кэпсэтии уонна хаартыскаҕа түһүү миэхэ оҕо сааһым биир чаҕылхай түгэнинэн буолар. Онон саҥа үүммүт сыл миэхэ саҥалыы, уратытык тыйаатыр сырдык эйгэтин кытта ыкса үлэлэһиинэн саҕаланна диэн этиэм этэ.

Ульяна ЗАХАРОВА.

2
0
Telegram @edersaas20