Уһук Илиҥҥэ уонна Арктикаҕа киһи хапытаалын сайыннарыы Ааҕыныстыбатын генеральнай дириэктэрин солбуйааччы Кирилл Миронов иһитиннэрэринэн, «Уһук Илиҥҥи гектар» бырагырааманан сир учаастага барыта 79 тыһыынча киһиэхэ сир бэриллибит.
edersaas.ru.
Ордук көхтөөтүк дьон сири Приморскай, Хабаровскай кыраайга, Сахалиҥҥа уонна Саха Өрөспүүбүлүкэтигэр ылаллар. Күннэтэ 1,5 тыһыынча сайаапка киирэр. Ааспыт күһүҥҥүттэн бу бырагыраамаҕа киллэриллибит Бурят Өрөспүүбүлүкэтигэр уонна Забайкальеҕа сир ыларга 6 тыһыынча киһи сайаапкалаабыт. Ити бырагыраама дьоҥҥо наадатын көрдөрөр. Дьон ылбыт сирдэригэр оҕуруот олордоллор, дьиэ-уот тутталлар, хаһаайыстыба тэринэллэр, «Саҥа саҕалыыр фермер», «Бааһынай хаһаайыстыба базатыгар дьиэ кэргнэн пиэрмэтин тэрийии» федеральнай бырагырааммаларга кытталар, быһата, үлэ-хамнас араас көрүҥүн тэрийэллэр.
Эргийиэннэр бэйэлэрин бүддьүөттэриттэн үп көрөннөр, «гектарынан» бэриллибит сирдэргэ инфраструктураны тэрийэллэригэр федеральнай бүддьүөттэн хос үбүлээһин оҥоһуллубут. Ол курдук, Хабаровскай кыраай 320 мөлүйүөн солкуобай, Саха сирэ 82 мөлүйүөн солкуобай ыланнар, кэлим тутууга бырайыак-симиэтэ оҥорбуттар уонна тутуу ыыта сылдьаллар диэн «Комсомольская правда» хаһыат суруйар. Онон, биһиги өрөспүүбүлүкэбит сири туһаҕа таһааран, олорорго-үлэлииргэ тупсаҕай усулуобуйаны тэрийиигэ Уһук Илиннээҕи федеральнай уокурукка инники күөҥҥэ сылдьарын федеральнай бэчээт боччумнаах уоргана бэлиэтээтэ.
Раиса Сибирякова, «Саха сирэ», edersaas.ru