Дьокуускайга «Үгэһи салҕааччылар» норуоттар икки ардыларынааҕы фест-форум буола турар. Бу туһунан А.Е.Кулаковскай аатынан норуоттар доҕордоһууларын дьиэтин пресс-сулууспата иһитиннэрэр.
Кэнчээригэ ыччакка, эдэр дьоҥҥо аналлаах тэрээһин сэттэ күн устата ыытыллар. Сүрүн болҕомто төрүт олохтоох норуоттар тылларыгар-өстөрүгэр, культураларыгар ууруллар. Манна 80-тан тахса кыттааччы кэлбит.
—Үөрүүлээх тэрээһин түһүлгэтигэр мустубуттары СӨ үөрэххэ уонна наукаҕа миниистирин бастакы солбуйааччы Ирина Любимова эҕэрдэлээтэ. Кини биһиги өрөспүүбүлүкэбитигэр тылы харыстыырга уонна үөрэтэргэ тиһиктээх үлэ ыытылларын бэлиэтээтэ.
Тэрээһин үөрүүлээх чааһыгар Самаана Винокурова (Өймөкөөн), «Северное сияние» үҥкүү-фольклор ансаамбыла, «Хокто» этнофольклорнай ансаамбыл (салайааччы Евдокия Алексеева, Эдьигээн), эбээн уонна дьүкээгир фольклорун илдьэ сылдьар Максим Дуткин, «Һээку» үҥкүү ансаамбыла (сал. Лариса Слепцова, Муома), «Тунгус-рекордс» устуудьуйаттан Иманна Сидорова (сал. Дьулустаан Сидоров, Александр Константинов, Алдан), «Аянесса» оҕо ансаамбыла (сал. Татьяна Чичигинарова, Эбээн-бытантай), Анаабыртан Сандаара Фадеева (сал. Афанасий Андросов), «Долгунча» этнофольклорнай ансаамбыл (сал. Зинаида Никулина), А.Е.Кулаковскай аатынан норуоттар доҕордоһууларын дьиэтин национальнай-культурнай түмсүүлэриттэн солистар, уо.д.а. кытыннылар.
Фест-форум үөрэх, айар дьоҕур уонна спорт хайысхаларынан үлэлиир. «Хоту дойду оһуордара» уус-уран оҥоһуктар быыстапкалара, төгүрүк остуоллар, хотугу таҥаһы тигиигэ маастар-кылаастар, о.д.а. ыытылыннылар. Маны сэргэ, үҥкүүгэ, ырыаҕа куонкурус уонна бырайыактары көрүү-истии буолла.
Тэрээһин кыттыылаахтара ыһыаҕы үөрүүлээхтик арыйыыга кытыннылар, 30-с №-дээх түһүлгэҕэ «Хотугу дьүкээбил» бырагыраамаларын билиһиннэрдилэр, спортивнай күрэхтэһии тэрийдилэр. Онно наартаны ойдулар, маамыктаны бырахтылар, хотугулуу ыстаныыга күрэхтэстилэр, хапсаҕайдастылар. Бу бэртээхэй түһүлгэҕэ сылдьыбыт дьон РФ сиригэр-уотугар төрүт олохтоох ҕыйах ахсааннаах норуоттар оонньууларын, культураларын, сиэрдэрин-туомнарын билсэннэр улаханнык сэргэхсийдилэр. Тэрээһин сарсын, от ыйын 3 күнүгэр, Ленин болуоссатыгар кэнсиэринэн түмүктэниэ.