“Газпром – оҕолорго” бырагырааманан Нерюнгри оройуонун Чульманыгар, Алдаҥҥа уонна Дьокуускайга успуорт эбийиэктэрэ тутуллуохтара. Вице-премьер Сергей Местников иһитиннэрбитинэн, эбийиэктэр балаҕан ыйыгар уонна алтынньыга үлэҕэ киириэхтээхтэр.
Бу эбийиэктэр Саха сирэ “Газпром” хампаанньаны кытары дуогабар түһэрсиитинэн, хампаанньа социальнай көҕүлээһиннэрин өйүүр анал пуонда нөҥүө тутулла тураллар. Бу эбийиэктэр үһүөн иккилии этээстээхтэр, катоктаахтар. Дьокуускайдааҕы спортивнай комплекска өссө икки бассейн баар буолуохтаах.
Билигин тутууларга ис үлэтэ бара турар. Бырабыыталыстыба бэрэссэдээтэлин солбуйааччы Сергей Местников бэлиэтээн эппитинэн, Алданнааҕы уонна Чульманнааҕы спортивнай комплекстар балаҕан ыйыгар, Дьокуускайдааҕы – алтынньыга бэлэм буолуохтаахтар. “Тутуулар быйыл күһүн бары үлэҕэ киириэхтэрэ. Өрөспүүбүлүкэбит сүүс сылынан бу оҕолорго дьоһун бэлэх буолуоҕа”, – диэн иһитиннэрэр кини мунньах кэмигэр. Ону таһынан кини эбийиэктэр уһаайбаларын, суолларын эмиэ тупсаран оҥорорго эттэ.
Аграфена КУЗЬМИНА