Дойду бөдөҥ бырамыысыланнай хампаанньата «Газпром» Саха сирин кытары бииргэ үлэлээбитэ номнуо онус сылыгар барда. 2026 сылга диэри «Сибиир күүһэ» магистральнай гаас турбатыттан утахтары ыытан, өрөспүүбүлүкэ түөрт улууһун гааһынан хааччыйыахтаах.
Анивера Акимова, «Саха сирэ» хаһыат, edersaas.ru
Бу күннэргэ Ил Дархан Егор Борисов «Газпром» ПАУо бырабылыанньатын бэрэссэдээтэлэ Алексей Миллеры кытары көрсөн, бииргэ үлэлээһиҥҥэ саҥа сөбүлэһиини түһэрсии туһунан кэпсэттилэр. Хампаанньа күн бүгүн бары күүһүн Илиҥҥи гаас бырагырааматын олоххо киллэриигэ үлэлэһэн, өрөспүүбүлүкэ бүддьүөтүгэр аҕыйаҕа суох үбү-харчыны нолуок быһыытынан киллэрэр.
Илиҥҥи гаас бырагырааматыгар туһаайан, Егор Афанасьевич Саха сиринээҕи гаас киинин тутуу үлэтигэр олохтоох тэрилтэлэр ахсааннарын элбэтэр туһунан бэлиэтээтэ.
Көрсүһүү түмүгүнэн, 2021 сылга диэри Ленскэйгэ, Нерюнгрига, Алдаҥҥа уонна Дьокуускайга эти-хааны эрчийэр кииннэри тутар туһунан дуогабардастылар. Санатан эттэххэ, билигин «Газпром – детям» бырагыраама чэрчитинэн, элбэх функциялаах спортивнай киин тутуллан үлэлии турар.
Ыспыраапка Газпром официальнай сайтыгар баар.
Анивера Акимова, «Саха сирэ» хаһыат, edersaas.ru
Хаартыскаҕа: Ил Дархан Егор Борисов «Газпром» ПАУо бырабылыанньатын бэрэссэдээтэлэ Алексей Миллеры кытары көрсүһүү кэмигэр.