Биэс харахтаах саха киһитигэр анаммыт харысхал туһунан Таатта улууһун култууратын салайааччыта Гаврил Вырдылин санаатын үллэһиннэ:
— Сыл саҕаланыыта тохсунньу 12 күнүгэр Борис Федорович Неустроев-Мандар Уустуун «сахалар биһиги итэҕэлбитигэр бэлиэлээхпит дуо» диэн ыйытыы тула кэпсэппиппит. Онуоха кини биэс харахтаах харысхал бэлиэ биһиги итэҕэлбит бэлиэтэ буоларын кэпсээбитэ. Кэлэр кэнчээри ыччакка тиэрдэргэ сорудахтаабыта. Ол сорудаҕы толорор инниттэн улууспут баһылыгар Михаил Соровка, миниистирдэр Юрий Куприяновка, Сахамин Афанасьевка, саха култууратын киэҥ эйгэҕэ тарҕатар уолаттарбытыгар Сиэйэ Уолугар, Виталий Очировка, Кэскил Баишевка уонна Баайаҕа баһылыгар Роман Романовка туттарбыппыт.
— Биэс харахтаах харысхал туһунан санаабын тиэрдэр буоллахха, өбүгэлэрбититтэн кэлбит харысхалбыт, ымыыбыт буолар. Маны сөргүтэн, дьоҥҥо-сэргэҕэ сөпкө тиэрдии үлэтин саҕалаабыт ытык киһи Борис Федорович-Мандар Ууска сүгүрүйэн туран махталбын, ытыктабылбын тиэрдэбин. Миэхэ бу харысхал бэлиэни Тааттаҕа тиийэ сырыттахпына тиэртилэр. Онон сахам дьоно, арчылаах, алгыстаах буолуҥ.
Ульяна Захарова, edersaas.ru
Хаартыскалары Гаврил Вырдылин тиксэрдэ.