Гаврил Семенов: Путин үөрэхтээһин эйгэтин уонна ыччаты иитии туһунан туох диирэ интэриэһиргэтэр
Өрөспүүбүлүкэ уопсастыбаннай палататын чилиэнэ, агротехнологическай үөрэхтээһин, экология уонна туризм научнай-үөрэтэр киинин дириэктэрэ Гаврил Семенов Россия бэрэсидьиэнин Федеральнай Мунньахха бүгүҥҥү Анал этиитигэр санаатын үллэһиннэ. Кини саныырынан, дойду экэниэмикэтин сайыннарыыга улахан болҕомто ууруллуоҕа.
“Владимир Путин экэниэмикэ сайдыытын уонна саҥаны киллэрии туһунан элбэҕи этиэ дии саныыбын. Билиҥҥи кэмҥэ тыын суолталаах космическай бырамыысыланнас тиэмэтин таарыйара саарбаҕа суох. Маны сэргэ үлэм хайысхатынан үөрэхтээһин эйгэтин уонна “ыам ыйынааҕы ыйаахтары” оннунан хаалларар, ону тэҥэ Уһук Илин уонна Арктика регионнарын сайдыыларын тустарынан истиэхпин баҕарабын”, — диэтэ Гаврил Семенов СИА-ҕа.
Судаарыстыба баһылыга сылга биирдэ Федеральнай Мунньахха дойду балаһыанньатын уонна ис уонна тас бэлиитикэ сүрүн хайысхаларын тустарынан Анал этии оҥорор. Бу бырагыраама хайысхалаах бэлиитикэ- быраап докумуона Россия сайдыытын стратегическай хайысхаларын чугастааҕы кэмҥэ көрөр кыаҕы биэрэр. Анал этиигэ бэлиитикэ, экэниэмикэ, идеология балаһыанньалара таарыйыллар, ону сэргэ парламент икки палататын сокуону оҥорууга этиилэрэ.
edersaas.ru