Култуура Маны аах

Гаврил Менкяров Барнаулга киинэ бэстибээлигэр «Дьулууру» илдьэ көттө

«Дьулуур: мас-рестлинг» киинэҕэ сүрүн оруолу толорбут Олоҥхо тыйаатырын артыыһа Гаврил Менкяров Барнаулга Шукшин аатынан бүтүн Арассыыйатааҕы киинэ бэстибээлигэр кыттар. От ыйын 19 күнүгэр бу бэстибээл 24-с төгүл аһылынна.

Биэс күн иһигэр толору миэтирэлээх уон уус-уран киинэ бэстибээл сүрүн бирииһин иһин киирсиэхтэрэ. Олор истэригэр режиссер Валентин Макаров туруорбут “Дьулуура” баар. Саха сиригэр уһуллубут киинэ Арассыыйаҕа биллэр продюсерскай киининэн үбүлэммитэ, продюсер Филипп Абрютин дойду үрдүнэн быракаат ыытарга элбэх сыратын бараабыта.

Бэстибээл сүрүн номинациятыгар турбут киинэлэр: «Понедельники» (реж. Евгений Григорьев), «Дьулуур: мас-рестлинг» (реж. Валентин Макаров), «Иваново счастье» (реж. Иван Соснин), «Сон» (реж. Мария Батова), «Маруся Фореvа!» (реж. Александр Галибин), «Непослушник» (реж. Владимир Котт), «Родители строго режима» (реж. Никита Владимиров), «Мой папа – вождь» (реж. Егор Кончаловскай), «Межсезонье» (реж. Александр Хант) уонна «Живы ли вы?» (реж. Ильдар Ягафаров).

Онон “Дьулуур” бэрт күүстээх режиссердар үлэлэрин кытта күөн көрсүөҕэ. Бэстибээл икки сыл хамсыктан сылтаан илэ ыытыллыбатаҕа. Быйыл көрөөччүлэгэ анаан киинэ тыйаатырдарыгар күрэскэ кэлбит үлэлэри көрдөрүөхтэрэ. Саха киинэтигэр ситиһиилэри баҕарабыт!

Егор Карпов.

0
0
Telegram @edersaas20