![](https://edersaas.ru/wp-content/uploads/2018/02/20180222_204836.jpg)
Бу хаартыскаҕа көрөр уолгут билиҥҥи ыччаттартан туох да итэҕэһэ суохтук үөрэнэн, үлэлээн-хамнаан, ыал буолан, аҕа буолар дьолу билэн испитэ… Онтон билигин кини үрдүгэр хара былыт…
edersaas.ru
Баара-суоҕа 26 эрэ саастаах, сүүрэ-көтө, үлэлилии сылдьыбыт Үөһээ Бүлүү улууһун Мэйик нэһилиэгиттэн төрүттээх Гаврил Лукиновка мэйиитигэр уонна кулгааҕар искэн тахсан, кини дьиэ кэргэнигэр улахан иэдээн ааҥнаабытын интэриниэт ситимиттэн истэн-билэн көрөр буолуохтааххыт.
Василий уонна Иданна биэс оҕолоох дьиэ кэргэттэригэр Ганя иккис оҕонон күн сирин көрбүтэ, бастакы уол буолан, кэтэһиилээх оҕо буолбута. Кыра сааһыттан эр киһилии сытыы-хотуу, үлэһит, булугас-талыгас, тиэхиньикэҕэ барытыгар сыстаҕас буола улааппыта. Аҕалара эрдэ олохтон туораан, Ганя ийэтигэр, бииргэ төрөөбүттэригэр бэрт кыһамньылаахтык сыһыаннаһара, барытыгар бары күүс-көмө буолан, аҕа оруолун толорор тутаах киһилэрэ этэ.
Билигин Лукиновтар дьиэ кэргэттэригэр саамай ыарахан, эппиэтинэстээх кэм ыган турар, «хантан харчы булан оҕобут олоҕун быыһыыбыт?» диэн санаа үүйэ-хаайа тутар. Хомойуох иһин, Саха сиригэр маннык ыарыыны эмтиир кыахтара суох буолан, эмтииртэн аккаастаан, дойду тэбэр сүрэҕэр – Москваҕа утаардылар… Кулун тутарга ыарахан эпэрээсийэни ааһаары, эмтэнээри анаалыс, бэрэбиэркэ ааһа сылдьаллар, ыҥырыыларын күүтэллэр. Оччо ыраах баран эмтэнэллэригэр, биллэн турар, үгүөрү үп-харчы наада. Соһуччута да бэрт буолан, ылбычча элбэх сууманы хантан да булар кыахтара суох, арай аймахтара уонна биһиги, бар дьон көмөбүт барытын кыайар кыахтаах.
Ганя эбээтэ тыыл уонна үлэ бэтэрээнэ, “Ийэ килбиэнэ” мэтээллээх Варвара Попова:
— Оҕом барахсан дьонтон итэҕэһэ суох этэҥҥэ сылдьыбыта ээ, тугу сыыһа-халты үктэнэн манныкка тиийбит бэйэкэтэй? Олорбут олохпутугар кимтэн да, хаһан да көмө көрдөөн ыксаабыппытын-ыгылыйбыппытын билбэппит, оҕо туһугар сүрэх көмө көрдөөн тилигирии мөхсөрө диэн киһи тылынан сатаан эппэт алдьархайа эбит… Оҕом үтүөрэн дьиэм аанын аһан мичилийэн киирдэҕинэ – уонна да бу олохтон көрдөһөрүм суох буолуо этэ…
Онон күндү Сахабыт сирин бар дьоно, Ганябыт ыраах эмтэнэ барарыгар туох-хайдах кыалларынан көмө-тирэх буолуохха, эдэр киһи олоҕун быыһыырга бары бииргэ туруулаһыахха, сомоҕолоһуохха диэн ааттаһан туран, ыҥырабыт.
Сбербаан счетун нүөмэрэ: 40817810876003119579 (бииргэ төрөөбүт эдьиийэ Карпова Ираида Егоровна), эбэтэр 89142977181 (Ираида Егоровна), 89644223047 (ийэтэ Иданна Егоровна) нүөмэрдэргэ мобильнай баан нөҥүө ыытыаххытын сөп.
Валентина ДОГОЮСОВА, Үөһээ Бүлүү