Нью-Йорка саахымакка аан дойду чөмпүйүөнүн быһаарар киирсии барбыта ый аҥарыттан орто. Бүгүн (28.11.) — бүтэһик, быһаарыылаах күн. Ахсаан тэбис-тэҥ. Россиянин Сергей Карякин уонна норвежец Магнус Карслен.
Гроссмейстердар 11 партия оонньоотулар да очукуолара 5,5:5,5. Партия барыта тэҥнэһиинэн түмүктэнэн истэ. Арай, ахсыс партияҕа Карякин кыайа сырытта эрээри, онус партияҕа хотторон тэҥнээн кэбистэ. Бэҕэһээҥҥи уон биирис — эмиэ тэҥнэһии.Бүгүн бүтэһик, 12-с партияларын оонньуохтара. Экспертэр сабаҕалыылларынан манна да тэҥнэһии буолуо. Гроссмейстердар тэҥнэрэ бэрт дуу, туох эрэ атын баар дуу?
Гаврил Колесов: 12-с партияҕа эмиэ тэҥнэһиэхтэрэ
Манна хоруй булаары, Edersaas.ru сайт аналлаах кэрэпэдьиэнэ гроссмейстеры, дуобакка аан дойду чөмпүйүөнүн Гаврил Колесовы көрдөөн буллум. Акыйаан нөҥүө буола турар бу улуу киирсиигэ (“Саахымат Сталинграда-2” диэххэ сөп) санаатын этэригэр көрдөстүм. Төлөпүөнүнэн кини манныгы суруйар:
- Прокопий, дорообо! Төһө да россиянин буолан Сергей Карякиҥҥа ыалдьыбытым иhин, эбии оонньууларга (регламент быһыытынан, 12 партия кэннэ кылгас бириэмэлээх “эбии оонньуулары” ыыталлар — П.Б.) Магнус Карлсен кыайыа дии саныыбын. Бу матчка Карлсен быдан интэриэhинэйдик оонньоото. Карякин оонньуута сухуой соҕус, наар көмүскэниигэ эрэ оонньуур. Карлсен, бүгүҥҥү күҥҥэ, ордуктук оонньуурун билиниэххэ наада.
- Бүгүн барыта быһаарыллан хаалараарай, кыайсан кэбиһиэхтэрэ суоҕа дуо?
- Тэҥнэһиэхтэрэ, эбии оонньууга тиийиэхтэрэ.
- Хайалара кыайыай?
- Карякин хотор кыаҕа кыра дии саныыбын…
Прокопий БУБЯКИН, дуобакка спорт маастарыгар кандидат.
Манна даҕатан
“Саахымат Сталинграда”
Бастакы “Саахымат Сталинграда” 1978 сыллаахха буолбута. Багиоҕа (Филиппиннэр) сэбиэскэй саахыматчыт Анатолий Карпов уонна биһигиттэн Америкаҕа күрээн барбыт гроссмейстер Виктор Корчной оонньообуттара. Эмиэ бүгүҥҥү курдук ньиэрбэ-хаан баранар киирсиитигэр 5:5 олорон Карпов бүтэһик оонньууга кыайан чөмпүйүөн аатын ылбыта. “Тымныы сэрии” кэмигэр сэбиэскэйдэр америкалары кыайбыт тэҥэ буолбуппут.
Ыспыраапка
Карякин Сергей Александрович,
26 саастаах, Россия гроссмейстера (эрдэ Украина).
1990 с Крымҥа төрөөбүтэ,
2009 с Россия гражданствотын ылбыта.
5 саастааҕар Краматорскай куоракка саахыматтаан саҕалаабыта.
12 сааһыгар саамай эдэр гроссмейстер буолбута.
Эдэркээн уол барыны-бары кыайан, билигин аны саахымат хоруонатын ылар иһин АХШ-га киирсэ сылдьар. Утарылаһааччытэ эмиэ эдэркээн уол Магнус Карлсен.
Кэргэннээх, уол оҕолоох.
Ыспыраапка
Свен Магнус Ээн Карлсен
26 саастаах, Норвегия гроссмейстера, аан дойду 16-с чөмпүйүөнэ.
1990 с Норвегияҕа төрөөбүтэ,
5 саастааҕар аҕата эмиэ улахан саахыматчыт Хенрик Карлсен үөрэтэн саҕалаабыта. 8 саастааҕар саахымат кинигэлэрин ааҕар, интернеккэ блиц-турнирдарга оонньуур буолбута.
Саахыматы таһынан футболлуур, хайыһардыыр, баскетболлуур. Таҥас рекламатыгар уһуллар. Аатырбыт Билл Гейтстыын (“Майкрософт”), Марк Цукербергтыын (“Фейсбук”) теле-шоу кэмигэр оонньоон кыайталаабыта.
Магнус билигин АХШ-га хоруонатын көмүскүү кэллэ.
Кэргэнэ, оҕото суох.
ВИДЕО-РЕПОРТАЖ КӨРҮҤ:
Сергей Карякин-Магнус Карлсен бу күннэргэ киирсибит партияларынан видеота:
https://www.youtube.com/watch?v=MD0yMNdZHOA 11 партия
https://www.youtube.com/watch?v=NcYQUKaVcqY 10 партия
https://www.youtube.com/watch?v=Wb9hC7ADV9Q 9 партия
https://www.youtube.com/watch?v=_uYaghnPi5M 8 партия
https://www.youtube.com/watch?v=Vm59YF_twDA 7 партия
https://www.youtube.com/watch?v=jebwgiW1Zks 6 партия
https://www.youtube.com/watch?v=yM0LswOvc4Y 5 партия
https://www.youtube.com/watch?v=-DTx5d7QfGo 4 партия
https://www.youtube.com/watch?v=0_XEKLZBTNY 3 партия
https://www.youtube.com/watch?v=4HowoTa2zoo 2 партия
https://www.youtube.com/watch?v=NcHXwtrj6IU 1 партия