Санкт-Петербург куоракка ыытыллар Нуучча дуобатыгар аан дойду чөмпүйэнээтигэр норуоттар икки ардыларынааҕы гроссмейстер Гаврил Колесов кыһыл уонна үрүҥ көмүс мэтээллэри ылла.
Алтынньы 20 күнүгэр буолбут блицкэ күрэхтэһиигэ 43 дойдуттан 74 дуобатчыт, ол иһигэр 22 гроссмейстер кыттыбытыттан, саха гроссмейстера эрэллээхтик оонньоон бастакы миэстэни ылла. Игорь Михальченко (Беларусь), Олег Дашков (Арассыыйа) иккис, үһүс буоллулар.
Сарсыныгар түргэн оонньууга Белоруссия дуобатчыта Игорь Михальченко кыайыылааҕынан буолла. Гаврил Колесов – иккис, Сергей Белошеев (Арассыыйа) үһүс миэстэлэргэ таҕыстылар.
Дьахталларга бу икки көрүҥҥэ Молдавияттан Елена Сковитина тэҥнээҕин булбата.
Билигин классическай бырагыраамаҕа күрэхтэһии саҕаланна.
Санатар буоллахха, алтынныьы 20 – 29 күннэригэр Санкт-Петербург куоракка ыытыллар аан дойду чөмпүйэнээтигэр дуобатчыттар үс бырагырааманан күрэстэһэллэр: блицкэ, түргэн оонньууга уонна классическайга. Манна Саха сириттэн үс дуобатчыт — Гаврил Колесов, Николай Стручков уонна Николай Гуляев — кыттар.
Роман Попов, “Саха сирэ” хаһыат, edersaas.ru