Гаврил Чемоханов: «Күрэхтэһиигэ кыттыыбын ыҥырыы курдук ылынабын»

Бөлөххө киир:

Спортсмен, уопсастыбаннай деятель Гаврил Чемоханов соторутааҕыта диализниктар уонна бүөрдэрэ көһөрүүлээхтэр Италияҕа ыытыллыбыт Европатааҕы чемпионаттарыттан илии тутуурдаах, өттүк харалаах кэллэ.

edersaas.ru

Урут эмиэ суруйбуппут курдук, Гаврил бу иннинэ Польшаҕа буолбут күрэхтэһиигэ 2 кыһыл көмүс, 4 үрүҥ көмүс уонна 1 боруонса мэтээллэр хаһаайыннарынан буолбута. Оттон бу сырыыга онус төгүлүн ыытыллыбыт, 25 дойду кыттыылаах Европа чемпионатыгар 5 көрүҥтэн диискэни быраҕыыга – иккис, бадминтоҥҥа – үһүс, сүүрүүгэ төрдүс миэстэлэри ылан, үрүҥ көмүс уонна боруонса мэтээллэргэ тигистэ.

Чемпионакка Арассыыйаттан 64 саастаах, икки боруонса уонна биир үрүҥ көмүс мэтээллээх Савельев диэн спортсменныын иккиэн  кытыннылар. Онон, биир дойдулаахпытын бу дьыалаҕа Саха сириттэн уонна Арассыыйаттан «пионер», суолу солооччу диэххэ сөп.

«Чемпионат кыттыылаахтара хас биирдиилэрэ бэйэлэрэ араас историялаах дьон. Ол гынан баран, кинилэри олоххо таптал, үрдүк үктэллэргэ дьулуһуу, күүстээх санаа, толору олоҕунан олорор баҕа санаа холбуур. Онон, биһиги уурбут ыллыкпыт спорт өссө үрдүк үктэллэригэр тириэрдэр улахан суолга кубулуйуон баҕарабын», – диэн спортсмен санаатын үллэһиннэ.

Гаврил бу сырыытыгар элбэх доҕоттордонон кэллэ. Холобур, Великобритания бэрэстэбиитэлэ, Европа чемпионатын биэс төгүллээх чөмпүйүөнэ, 5 сыл көһөрүү бүөрдээх сылдьар Мэтта Маккей бүөрдэрэ көһөрүүлээх дьон эрчиллэр ураты ньымаларын билиһиннэрдэ. Гаврил, биллэн турар, ону бэйэтинэн боруобалыан, туһаныан баҕарар.

«Биһиги маннык күрэхтэһиилэргэ кыттыыбытын кырдьаҕастарга, доруобуйаларынан хааччахтаах дьоҥҥо ыҥырыы курдук ылынабыт. Хамсааһын таҕыстаҕына, нэһилиэнньэ бу араҥата толору олоҕунан олорорго дьулуһуо, кыаҕа баарынан, спорт араас көрүҥүнэн дьарыктаныа этэ», – диир уонна түгэнинэн туһанан, Европа чемпионатыгар баран кыттарыгар көмөлөспүт үтүө-мааны дьоҥҥо ис сүрэҕиттэн махтанар. Ол иһигэр, Италияҕа билиэт ыларыгар көмөлөспүт уонна ортопедическай угунньа, тобукка аналлаах бандаж бэлэхтээбит “Notabene” фирмаҕа, «Трансстрой» дириэктэрэ Денис Мункоевка, «Аҕалар лигалара» бэрэссэдээтэлэ Айхал Габышевка, инбэлииттэр өрөспүүбүлүкэтээҕи уопсастыбаларыгар (Ирина Лебедева), эмтиир быраастарыгар, адаптивнай киин тириэньэригэр.

Гаврил Чемоханов аныгыскыга Англияҕа ыытыллар чемпионакка ыҥырылынна.

Надежда ЕГОРОВА, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0