Саха бэйиэтэ, “Чолбон” сурунаал бас эрэдээктэрэ, публицист уонна тылбаасчыт Гаврил Андросов кыайыы көтөллөөх кэллэ. “Справедливая Россия – за правду” баартыйа Литературнай бириэмийэтин поэзияҕа хайысхатыгар кыайда.
«В поисках правды и справедливости» диэн Литературнай бириэмийэ 2015 сыллаахха олохтоммута. Дойду араас муннуктарыттан эдэр талааннары булар, өйүүр, ону тэҥэ, патриотическай өйү-санааны бөҕөргөтөр сыаллаах. Быйыл сэттис төгүл туттарылынна. Кыайыылаахтары Москваҕа Судаарыстыбаннай бибилэтиэкэ саалатыгар мустулар.
Дьүүллүүр сүбэни баартыйа фракциятын Госдумаҕа салайааччыта Сергей Миронов салайбыт.
—Бириэмийэни туттарыы судургута суох кэмҥэ ааһар. Бүгүн бириэмийэни туттарыы сиэрэ-туома Донбасс сиэртибэлэригэр уонна байыаннай эпэрээссийэ кэмигэр өлбүт буойуттар кэриэстэригэр ананар 1 мүнүүтэ саҥата суох турууттан саҕаланар.
Эдэр бэйиэттэргэ, прозаиктарга, публицистарга көмөлөһөр кыах баара олус үчүгэй. Дьүүллүүр сүбэ бэлиэтээбит ааптардарын литературнай сурунааллар уонна кинигэ кыһаларын эрэдээктэрдэрэ көрөн-истэн, үлэлэһэн бараллар. Биһиги дойдубут талааннарынан баай, кинилэргэ көмөлөһүү – биһиги сорукпут, ол онтон үөрэбит эрэ, — диэн Сергей Миронов эттэ.
Үөрүүлээх быһыыга-майгыга Гаврил Андросов хоһоонун үтүөлээх артыыс Владимир Конкин ааҕыытыгар видео уһуллубутун көрдөрдүлэр. 2017 сыллаахха кыайбыт Антон Школьников хоһоонун видеоҕа устан, ааҕан көрдөрдүлэр. Ону тэҥэ, РСФСР норуодунай артыыһа Александр Михайлов уонна РСФСР үтүөлээх артыыската Наталья Варлей хоһоон ааҕан иһитиннэрдилэр.
«Молодая публицистика России» номинацияҕа 1-кы миэстэни Луганскай Өрөспүүбүлүкэтиттэн Юрий Ковальчукка анаатылар, наҕарааданы дьоруой дьиэ кэргэнигэр тиэрдиэхтэрэ.
«Молодая проза России» номинацияҕа кыайыылааҕынан Юрий Харлашкин (Иркутскай уобалас) буолла.
«Молодая поэзия России» номинацияҕа дьүүллүүр сүбэ 1-кы миэстэни Гаврил Андросовка уонна Елизавета Евстигнееваҕа (Москва) биэрдэ.
Маны таһынан, 2-с, 3-с миэстэлээхтэр уонна элбэх лауреаттар бааллар. Саха сириттэн Тимофей Ефремов “Молодая публицистика России” номинацияҕа лауреат буолан, бэлиэтэннэ.
Ангелина Васильева, “Саха сирэ” хаһыат, edersaas.ru
Хаартыска: Г.Андросов.