Бэлиитикэ Маны аах

Гаврил Алексеев: Бэйэ оҥорон таһаарыыта, экэниэмикэбит саҥалыы сайыннын

Гаврил Алексеев, норуот дьокутаата, «Сахаэнерго» АУо генеральнай дириэктэрэ:

— 77 сыл аннараа өттүгэр биһиги эһэлэрбит ньиэмэс нацистарын имири эһэн тураллар. Кинилэр хорсун быһыыларын, ураты дьылҕаларын холобур оҥостон улааппыт дьон буолабыт. Аҕа дойдубутун, эйэлээх олоҕу, көҥүлбүтүн көмүскээбит көмүс дьоммут баар буолан эйэлээх олоххо олорон кэллибит, баҕабыт хоту үөрэнэбит, үлэлиибит, дьиэ-уот тэринэбит, оҕо төрөтөбүт.

Хомойуох иһин, саҥа үйэҕэ националистар төбөлөрүн эмиэ өрө көтөхтүлэр. Арассыыйа киэҥ нэлэмэн сиригэр, хостонор баайыгар элбэх судаарыстыба хараҕын уотун бырахпыта ыраатта. Кэнники сылларга дойдубутун аһаҕастык туоратыы, сиэрэ суох быһыы-майгы, санкциянан күрүөлээһин саҕаламмыта ыраатта.

Арҕааҥҥы националистар ордук Украинаны уонна бу дойду норуотун атахтарын соттор, бөхтөрүн, кирдээх, кутталлаах технологияны, сэби-сэбиргэли үөрэтэр, мунньар, кистиир сир оҥоһуннулар. Украина салалтатын ытырыык ыт курдук иитэн таһааран баҕарбыттарынан салайаллар.

Украина сиригэр мунньуллубут сэп-сэбиргэл Арассыыйаны утары туттуллуохтааҕын бары өйдүүбүт.

Бу сылларга улахан атаҕастабылы Луганскай уонна Донецкай өрөспүүбүлүкэлэр көрүстүлэр. Онно бэйэбит дьоммут олорор буолан туох да буолбатаҕын курдук көрөн олорорбут хайдах да сатаммат этэ.

Тыҥааһыннаах балаһыанньа бүрүүкээбитин Арассыыйа салалтата кэмигэр өйдөөн, националистары утары байыаннай анал эпэрээссийэни ыытар туһунан судургута суох эрээри, соҕотох сөптөөх дьаһала тахсыбыта.

Уоту уотунан умуораллар. Бу улахан утары турсууга Арассыыйа хайаан даҕаны кыайылаах тахсыахтаах. Бары өттүнэн. Санкциялартан тэптэн бэйэ оҥорон таһаарыыта, экэниэмикэбит саҥалыы сайыннын. Арассыыйа элбэх омуктаах норуота түмсүүлээх буоллун, дойдуга таптал, киэн туттуу туругурдун.

Нацистары кыайбыт, эйэни олохтообут аҕа көлүөнэбит, дойдубут урдүк аатын туһугар иннибит хоту!

0
0
Telegram @edersaas20