Гаврил Адамовы БАМ уонна АЯМ тутааччыллара «легендарнай» хамыһаарбыт диэн киэн тутта ааттыыллар.
edersaas.ru
1974 сыл ыам ыйын 15 күнүгэр «Головной якутский отряд» диэн ааттаан саха ыччаттарыттан таҥыллыбыт бастакы этэрээти үөрүүлээх быһыыга-майгыга анаан чиэстээн атаарбыттара. Ол онно этэрээт хамыһаара, төлөннөөх комсомолец Гаврил Адамов: «Тимир суолу Саха сиригэр хайаан да аҕалыахпыт!» — диэн андаҕайбыта.
— Этэрээппит 17 киһиттэн турар этэ: 4 кыыс и 13 уол. Кинилэр ортолоругар аармыйаттан саҥа кэлбит түөрт эдэр киһи баара.
Биһиги үлэлии тиийбит «Беленькая» диэн сирбитигэр уоннуу миэстэлээх икки эрэ балаакка турара. Ириэрии буолан, уу-хаар бөҕө этэ.
Тимир суол трассата ааһыахтаах, муосталар тутуллуохтаах сирдэрин ыраастаабыппыт, бэлэмнээбиппит. Тутуу күнүстэри-түүннэри көхтөөхтүк барара. Күһүн ыстаансыйа тутуохтаах сирбитигэр көһөн тиийбиппит. Онно богуоннар тутуллар сирдэригэр үлэлээбиппит, остолобуой туппуппут.
1975 сыл олунньуга Нагорнай диэн саҥа ыстаансыйаны тутан үлэҕэ киллэрбиппит, — диэн кэпсиир Гаврил Адамов.
Нагорнай ыстаансыйаны тутан дьэндэппит «Саха сирин комсомолеһа» хара үлэҕэ эриллибит биир саамай уопуттаах этэрээт буоларын көрдөрбүтэ. Ол да иһин кинилэри РСФРС үтүөлээх тутааччыта Карен Гараев биригээдэтигэр сыһыарбыттара.
Онтон Амурскай уобаласка тимир суол «үрүҥ көмүс» уонна «кыһыл көмүс» утахтарын ууруу, Нагорнай, Золотинка, Беркакит… Саха ыччаттара иннилэрин хоту төрөөбүт дойдуларыгар тимир суолу чугаһатан испиттэрэ.
— Өскө дьалхааннаах уларыта тутуу саҕаламматаҕа буоллар, 90-с сыллар саҥаларыгар Дьокуускайга диэри тимир суол кэлиэхтээх этэ, — диэн санаатын үллэстэр Гаврил Адамов. Сэбиэскэй кэм комсомолецтара бэйэлэрин хамыһаардарын пуойаска көрсөн, оҕолуу үөрдүлэр, үөрүүлэрин үллэһиннилэр.
45 сыллааҕыта тимир суолу тута барар саха ыччаттарын этэрээтин хамыһаара Гаврил Адамов Аллараа Бэстээххэ кэлэн, историяҕа көмүс буукубанан суруллубут бастакы пуойас бочуоттаах пассажира буолан, андаҕарын чиэстээхтик толордо.
Билигин легендарнай хамыһаары сиэннэрэ арыаллыыллар.
Елена ПОТОЦКАЯ, «Саха сирэ» хаһыат, edersaas.ru
Хаартыска интэриниэттэн уонна ааптар түһэриитэ.