![](https://edersaas.ru/wp-content/uploads/2020/04/11-16.jpg)
Өймөкөөн улууһа тылга-өскө ураты талааннаах дьонунан баай.
edersaas.ru
Ордук Төрүт нэһилиэгэр суруйар дьон үгүс. Cаха аатырбыт лиирик-бэйиэтэ Пантелеймон Тулааһынап, өрөспүүбүлүкэҕэ биллэр алта суруналыыс бу нэһилиэктэн төрүттээхтэр. Кинилэртэн биирдэстэрэ бу күннэргэ үбүлүөйдээх 80 сааһын туолбут Афанасий Гермогенов-ГАС-Оппуонньа буолар. Афанасий Степанович толору аатын бастакы буукубаларын ылан псевдоним оҥостубута. Онон кинини биир дойдулаахтаа ГАС-Оппуонньа диэн таптаан ааттыыллар. Айар куттаах киһи бу псевдонимынан биллэр Саха суруйааччыларын сойууһун чилиэнэ, улуус хаһыаттарын актыыбынай общественнай кэрэспэдьиэнэ. Кини дьиэтээҕи баай бибилэтиэкэтэ доҕотторо-атастара — саха суруйааччылара киниэхэ бэлэхтээбит бэйэлэрэ автографтаах кинигэлэринэн баай. Бу 2016 сыллаахха табаарыһынаан, суруйааччы Николай Винокуровтыын-Урсуннуун биир дойдулааҕа, лиирик-бэйиэт Пантелеймон Тулааһынап үбүлүөйдээх 100 сылын туолар тэрээһинигэр Тарыҥҥа сылдьан түспүт хаартыскалара.
ГАС-Оппуонньа төрөөбүт дойдуга бэриниилээх буолуу, таптал, олох туһунан кэпсээннэрэ үгүс ааҕааччы кутун тутар. Афанасий Степанович кыраайы үөрэтээччи быһыытынан төрөөбүт Төрүтүн дьонун, улуус социальнай-экономическай сайдыытыгар сүҥкэн кылааттарын киллэрбит араас омук дьонун тустарынан бэрт дириҥ ис хоһоонноох хас да кинигэни суруйан таһаарда.
Афанасий Гермогенов-ГАС-Оппуонньа төһө да дьоһуннаах 80 сааһын бэлиэтээтэр, билигин да уруучукалаах тэтэрээтин туппутунан сылдьар айар куттаах, олоххо көхтөөх киһи. Кини бу күннэргэ үбүлүөйүн киэҥник бэлиэтиэхтээх этэ да, коронавирус эпидиэмийэтэ мэһэйдээн кээстэ. Онон кырдьаҕас суруналыыс дьиэтигэр олорон дьонун-сэргэтин эҕэрдэтин тутар. Өрүү бүгүҥҥүҥ курдук күлэ-үөрэ, айа-тута сырыт дуу, айар куттаах Афанасий Степанович-ГАС-Оппуонньа!
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Спиридон Слепцов түһэриитэ.