«Биир ньыгыл Арассыыйа» баартыйа сокуонун бырайыага Арассыыйа 3,5 мөлүйүөн олохтооҕор гараастарын уонна гараас турар сирин регистрациялыырга уонна гарааһы көтүрүү түбэлтэтигэр өйөбүл буолуоҕа.
Ол курдук, «Гараас амнистията» үтүмэн үгүс докумуону толорууттан босхолуоҕа уонна докумуону толоруу сыанатын биллэ аччатыаҕа. Билигин гараас учаастагын бас билиигэ биэрии сыаната, Росреестр чахчытынан, ортотунан 5-7 тыһыынча солкуобай. Манна госпошлина эбиллэр. Сокуон бырайыагынан бу боппуруоһунан бэйэни салайыныы уорганнара дьарыктаныахтара. Гараас амнистиятын сокуонун бырайыагар этиллэринэн, бас билээччи буолар туһунан бигэргэтиигэ гараас кэпирэтиибин чилиэнэ буолары туоһулуур ыспыраапка, гараас техбылаана, эбэтэр техническэй инвентаризация выписката ирдэнэр. Гараас амнистията 2026 сыл кулун тутар 1 күнүгэр диэри үлэлиэҕэ. Сокуон бырайыагын автомобилистар Бүтүн сойуустааҕы уопсастыбалара өйөөтө. Тэрилтэ салайааччыта Валерий Солдунов бэлиэтээбитинэн, сокуон бырайыага гражданнар интэриэстэригэр эппиэттиир. Ил Түмэн дьокутаата, сир сыһыаннаһыытыгар, айылҕа ресурсаларыгар уонна экология боппуруостарыгар сис кэмитиэт салайааччыта Владимир Прокопьев «гараас амнистиятын сокуона докумуона суох гараастары уонна гарааска анаммыт сир учаастактарын бэрээдэктиир боппуруоска өйөбүлүнэн буолуоҕа. Дьон гараас тутуутун боппуруоһун судургутук быһаарыахтара. Маны таһынан, нэһилиэстибэ, атыылааһын, бэлэхтээһин, кирэдьииккэ ылыы курдук боппуруостарга быраабы судургутутуоҕа» диэн эттэ. Гараас амнистиятын сокуонун бырайыагын дойду бары эригийиэннэриҥэр дьүүллэһэн баран, 2021 сыл кулун тутарга ылыллыаҕа.
Елена ПОТОЦКАЯ, «Саха сирэ» хаһыат, edersaas ru