Галина Данчикова: «Парламент үлэтин түмүгэ олоххо киирэриттэн үөрэбин»

Ааптар: 
Бөлөххө киир:

Судаарыстыбаннай Дуума дьокутаата Галина Данчикова Өлүөхүмэ куоратыгар «Демография» федеральнай национальнай бырайыагынан тутуллар эбийиэктэр тутууларын хаамыытын билистэ.

Бастакы тутуу үс этээстээх, 240 миэстэлээх оҕо саада. Бэдэрээтчик «Монтажник» ПК бэрэстэбиитэлэ этэринэн, үлэ кыраапык быһыытынан баран иһэр. Билигин эпсиэйдээһин, тиэргэҥҥэ бетоннааһын үлэтэ уонна септиги тутуу саҕаламмыт. 

Иккис тутуу – кырдьаҕас дьоҥҥо уонна инбэлииттэргэ аналаах 200 миэстэлээх дьиэ. Бэдэрээтчик эмиэ «Монтажник» ПК былаанын тутуһан иһэр.

Өлүөхүмэҕэ ыалы уонна аҕа көлүөнэ дьону өйүүр сыаллаах федеральнай бырагырааманан икки улахан эбийиэк тутулла турара олус үчүгэй. Бу парламент үлэтин түмүгэ олоххо киириитэ буолар. Тутааччы хаачыстыбалаахтык үлэлиир эбит, – диэн норуот дьокутаата тутааччылары хайҕаата.


Галина Иннокентьевна салгыы 76-дээх аптекаҕа сырытта, исписэлиистэри кытары кэпсэтииттэн улуус нэһилиэктэригэр аптека ситимэ сарбыллыбатаҕын, ачыкы уонна эмп-томп оҥоһулларын истэн үөрдэ да, соһуйда да. Почта отделениетыгар сылдьан, электроннай уочарат суоҕар болҕомтотун уурда. Дьокуускайга тиийдэҕинэ, Өлүөхүмэ почтатын сыыппара технологиятынан сэбилиир туһунан боппуруоһу «Арассыыйа почтатын» Саха сиринээҕи салаатын начальнига П.Птицыны кытары быһаарсыах буолла.

«Калина» маҕаһыыҥҥа сылдьан, ас-үөл сыаната ыараханын бэлиэтээтэ, онуоха эргиэн киинин хаһаайына Роман Стефанчук сыананы тиэйии-таһыы ороскуота үрдэтэрин эттэ. Аһылык табаара нефтяниктар технологическай суолларынан аҕалыллар, биир массыына бырайыаһа 190 тыһыынча солкуобайга тиийэр эбит. Онуоха Галина Иннокентьевна өрөспүүбүлүкэ сиригэр-уотугар сир баайын хостуур хампаанньалартан ыйытарым элбэх, бу боппуруоһу хайаан да таарыйыам диэтэ.

Өлүөхүмэттэн Татьяна Романова.

+1
0
+1
0
+1
0
+1
0
+1
0
+1
0
+1
0