Улуу Кыайыы умнуллубат өрөгөйдөөх күнэ — бу ураты сүдү суолталаах, дириҥ өйдөбүллээх. Аҕа дойдуну көмүскээччилэр булгуруйбат модун санаалаарын, хорсун быһыыларын, элбэх норуоттаах дойдубут харса суох күүстээх үлэтин биһиги өйбүтүгэр-сүрэхпитигэр умнуллубаттык иҥэрэн илдьэ сылдьабыт.
Түмсүүлээх, сомоҕолоһуулаах, күүстээх модун санаалаах эрэ норуот киһи-аймах устуоруйатыгар дириҥ бааһы хаалларбыт кырыктаах сэриини кыайарын, эрэйи-муҥу эҥэринэн тэлэн, урусхалламмыт куораттары, дэриэбинэлэри кэхтибэккэ өрө көтөҕөр кыахтааҕын көрдөрбүтэ, хоһуун буолан ол хабараан сыллары кытаанахтык тулуйбута.
Биһиги Аҕа дойдуну хорсуннук көмүскээбит ытык дьоммутунан киэн туттабыт. Кинилэр хорсун-хоодуот быһыыларын үрдүктүк сыаналаан, саха буойуттарыгар судаарыстыба үрдүкү наҕараадалара туттарыллыбыттара — Советскай Сойуус Дьоруойа, Арассыыйа Дьоруойа, Албан аат уордьанын толору кавалердарынан буолбуттара.
Улуу Кыайыыны уһансыбыт ытык дьоммутун ытыктыыр, кэриэстиир, харыстыыр уонна эдэр көлүөнэҕэ, кэнчээри ыччакка умнуллубат өйдөбүлү тиэрдэр ытык иэспитинэн буолар. Биһиги эйэлээх олоҕу уһансыбыт ытык кыырдьаҕастарбытыгар, бэтэрээннэрбитигэр үтүө тылбытынан эрэ буолбакка, чопчу дьыаланан, туох баар кыалларынан муҥура суох махталбытын биллэрэр эбээһинэстээхпит.