Саха Өрөспүүбүлэкэтиттэн Судаарыстыбаннай Дуумаҕа дьокутаат Галина Данчикова ааспыт нэдиэлэҕэ ойуур баһаардарын умуруорууга үбү-харчыны тардыыга үлэлээтэ.
Даҕатан эттэххэ, норуот дьокутаата өрөспүүбүлүкэҕэ үбү тардыыга быйыл эрэ кыһаммыт буолбатах, дьокутаат мандаатын тутуоҕуттан утумнаахтык үлэлиир. Ол курдук, Арассыыйа Федерациятын субьектарыгар ойуурга сыһыаннаһыыга туспа боломуочуйалары олохтооһуҥҥа федерация бүддьүөтүттэн субьектар икки ардыларыгар үбү тыырыы методикатыгар уларыылары киллэриигэ үлэлэһэ сылдьар.
Өрөспүүбүлүкэ бырабыыталыстыбатын кытары сүбэлэһэн, Судаарыстыбаннай Дуума тустаах кэмитиэтин итиэннэ Арассыыйа бырабыыталыстыбатын, Айылҕа харыстабылын министиэристибэтин кытары ыкса үлэлэһэр. Ол түмүгэр урукку өттүгэр төрүт суох «Арасыыйа Федерациятын бырабыыталыстыбата 2020 с. балаҕан ыйын 11 күнүгэр таһаарбыт ыйааҕын чэрчитинэн, Ойуур Кодексатын быһыытынан бэриллибит ойуурга сыһыаннаһыы эйгэтигэр Арассыыйа Федерациятын боломуочуйатын толорууга субвенция уопсай кээмэйин тыырыы быраабылалара» диэн саҥа бэрээдэк бигэргэммитэ. Бу быраабылалар кэлэр 2022 сыл тохсунньу 1 күнүттэн олоххо киллэриллиэхтэрэ, федерация бүддьүөтүттэн эрэгийиэннэр бүддьүөттэригэр субвенцияны (боломуочуйаны толорууга көрүллэр харчыны) ааҕыыга төрүт буолуохтара.
Ааспыт сылларга «Ойууру харыстааһын» федеральнай бырайыак чэрчитинэн, федерация бүддьүөтүттэн ойуур баһаарын утары туһаныллар тиэхиньикэнэн уонна тэрилинэн хааччыллыыга харчы көрүллэн, Саха Өрөспүүбүлүкэтэ кэлиҥҥи үс сылга 431,7 мөл. солк. ылбыта.
Былырыын көмө быһыытынан ойуур баһаардарын умуруорууга итиэннэ ойуур баһаарыттан сэрэхтээх буолууну мониториннааһыҥҥа 772,8 мөл. солк эбии көрүллүбүтэ. Ол иһигэр федерация бүддьүөтүттэн субвенция үллэһиллибэт саппааһыттан – 111,8 мөл. солк., Арассыыйа бырабыыталыстыбатын саппаас пуондатыттан – 661 мөл. солк.
Быйыл ойуур баһаардарыттан сылтаан тыҥааһыннаах быһыы-майгы үөскээбитинэн өссө биир дьоһун хардыы оҥоһулунна. Ил Дархан Айсен Николаев уонна Галина Данчикова Арассыыйа бырабыыталыстыбатын бэрэссэдээтэлэ Михаил Мишустиҥҥа кэмигэр оҥоһуллубут көмө иһин махталларын биллэрдилэр итиэннэ анал тиэхиньикэни, туттар тэрили, аһы-үөлү хааччыйарга судаарыстыба саппаас пуондатыттан эбии үбү көрөргө көрдөһөн суруйдулар. Онуоха атырдьах ыйын 9 күнүнээҕи туругунан, өрөспүүбүлүкэ сиригэр-уотугар 156 ойуур баһаара баарын, онтон 72-тигэр дьаһал ылылларын, олорго 3700 киһи уонна 551 тиэхиньикэ тардыллан үлэлии-хамсы сылдьалларын туһунан бэлиэтээтилэр. Итини таһынан өрөспүүбүлүкэ аатыттан ойуур баһаардарын умуруорууга 500 мөл. солк. эбии көрөргө сайаапка түһэрилиннэ. Харда тута кэллэ: сайаапка ылыллыбыт, көмө ЫБММ чугастааҕы базаларыттан бэриллэр!
Андрей Михайлов