Гайдаровскай пуорум иитинэн, тохсунньу 14 күнүгэр, СӨ Ил Дархана Айсен Николаев «Цифровая трансформация госуправления: нужна ли нам стратегия?» диэн кэпсэтиигэ кыттынна.
Кэпсэтиигэ РФ цифровой сайдыытын, сибээһин, маассабай коммуникация миниистирин солбуйааччы Олег Качанов, Арассыый биллэр-көстөр эспиэрдэрэ кыттан, куораттарга цифровой өҥөнөн хааччыллыы, цифровой судаарыстыбаннай салайыы тула кэпсэттилэр.
Айсен Николаев цифровой трансформация үтүө эрэ өрүттэрдээҕин бэлиэтээн эттэ. Цифровизация баар буолан, ыраах сытар нэһилиэнньэлээх пууннар олохтоохторо туһааннаах өҥөлөрүнэн суһаллык туһанар кыахтаахтарын бэлиэтээтэ. «Саха сиригэр цифровой трансформация хайаан да наада. Билигин Саха Өрөспүүбүлүкэтэ IT-технологиялары олоххо киллэриигэ Уһук Илин эрэгийиэнигэр инники күөҥҥэ сылдьар. Цифровой трансформациянан сибээстээн, олохтоохтор Саха сирин бас-көс IT-хампаанньаларыгар үлэлиир, стратегическай суолталаах былааннары олоххо киллэриигэ кыттар кыахтаахтар», – диэн Ил Дархан эбэн эттэ.
РФ цифровой сайдыытын, сибээһин, маассабай коммуникация миниистирин солбуйааччы Олег Качанов билигин салайааччылар иннилэригэр социальнай суолталаах судаарыстыбаннай уонна муниципальнай өҥөлөрү цифровой формакка көһөрүү соруга турарын эттэ.
Билигин туһааннаах министиэристибэ Арассыыйатааҕы норуот хаһаайыстыбатын уонна судаарыстыбаннай сулууспа академиятын (РАНХиГС) кытары цифровой трансформация салайааччыларын бэлэмнииллэр.
Онтон Саха сиригэр хас биирдии министиэристибэҕэ уонна биэдэмистибэҕэ цифровой трансформацияҕа эппиэттээх дьоннор бааллар. Бу исписэлиистэр бырайыактыыр офис чилиэннэринэн буолаллар.
СӨ Ил Дарханын уонна Бырабыыталыстыбатын пресс-сулууспата