Дьокуускай куораттааҕы 2 №-дээх балыыһаҕа (Кузьмина уул. 10) саҥа отделение аһылынна.
Надежда ЕГОРОВА, «Саха сирэ» хаһыат, edersaas.ru
Балыыһа кылаабынай бырааһа Саргылана Васильева иһитиннэрбитинэн, бу – авиапорт оройуонугар поликлиника номнуо иккис отделениета. Бастакы отделение былырыын Кузьмина 30/2 аадырыска аһыллыбыта.
Саҥа отделениеҕа учаастактааҕы икки быраас үлэлиэҕэ. Манна процедура, массаас уонна эмтиир физкультура кабинеттарын ааннара аһылынна. Ону таһынан, куорат Гагарин уокуругун уонна Марха оройуонун олохтоохторугар төлөбүрдээх өҥөлөр баар буолуохтара. Ол эбэтэр суоппар быраабын ыларга, сааны-саадаҕы илдьэ сылдьарга, үлэҕэ ылылларга уо.д.а. наадалаах ыспыраапкаларга психиатр уонна нарколог өҥөлөрүнэн туһаныахтара.
Дьокуускай куораттааҕы 2 №-дээх балыыһа саҥа отделениетын үөрүүлээх аһыы сиэригэр-туомугар Дьокуускай к. доруобуйа харыстабылыгар управлениетын начальнигын бастакы солбуйааччы Артур Протодьяконов, Куорат Думатын бэрэссэдээтэлин солбуйааччы Марина Силкина уонна Гагарин уокуругун баһылыга Руслан Платонов кытыннылар.
Артур Протодьяконов эҕэрдэ тылыгар: «Эһиги балыыһаҕыт кэлэктиибэ ситиһиллибитинэн тохтоон хаалбат уратылаах. Ити тэтимҥитинэн сотору кэминэн поликлиника саҥа дьиэтин аһыллыытыгар кыттыахпыт диэн эрэнэбин», – диэтэ уонна куорат дьаһалтатыгар, дьокутааттарыгар нэһилиэнньэ доруобуйатын харыстабылын боппуруостарын быһаарыыга куруук бииргэ үлэлииллэригэр махтанна.
Гагарин уокуругун балыыһатын биир улахан кыһалҕатынан поликлиника саҥа дьиэтин тутуу боппуруоһа буолар. Билигин өрөспүүбүлүкэ бюджетын суотугар бырайыактыыр смета докумуона оҥоһулла сылдьар. СӨ Архитектураҕа уонна тутуу комплексыгар министиэристибэтин былаанынан, бырайыак быйыл оҥоһуллан бүтүөҕэ. Сменаҕа 600 киһи көрдөрүнэр поликлиниката «2015-2019 сылларга өрөспүүбүлүкэ киин куоратын социальнай-экономическай сайдыытын туһунан» СӨ Ил Дарханын 2014 сыллааҕы Ыйааҕынан тутуллуоҕа. Манна сыһыаран эттэххэ, Дьокуускай куорат 2 №-дээх балыыһата 40-н тахса тыһыынча киһи, ол иһигэр 12 тыһыынча оҕо, доруобуйатын көрөр-истэр.
Надежда ЕГОРОВА, «Саха сирэ» хаһыат, edersaas.ru