Уопсастыба

Гаас уматыга сыанатынан чэпчэки уонна айылҕаҕа буортута кыра

Гаас уматык чэпчэки сыаналаах, айыл5а5а буортута кыра.

Саха сиригэр былаан быһыытынан гаас уматыгы киэҥник сайыннарыыны киллэрэр санаалаахтар. Билиҥҥи туругунан эрэгийиэҥҥэ аҕыс гааһынан хааччыйар компрессорнай ыстаансыйа баар. Онтон 23 – массыыналары уматыгынан хааччыйар заправкалар, 22 – көһө сылдьар тиэйиллэр ыстаансыйа буолар. CӨ Ил Дархана Айсен Николаев иһитиннэрбитинэн, 2030 сылга маннык ыстаансыйа ахсаана 40-ҥа тиийиэхтээх. Маннык уматык сыаната чэпчэкитэ уонна айылҕаҕа буортута кыратынан биһирэнэр. Бырамыысыланнас министиэристибэтигэр иһитиннэрбиттэринэн, 1 м3 углеводороднай убатыллыбыт гаас сыаната – 24.50 солкуобай, оттон компримированнай айылҕа гааһын сыаната – 21 солкуобайга тэҥнэһэр. Оттон эрэгийиэҥҥэ бензин лиитирэтин сыаната – 56-57 солкуобайга тэҥнэһэр. Саха сиригэр гаас үөскүүр Бүлүү сиригэр уонна Саха сирин арҕаа эҥээригэр бу үлэ ситимин салгыы сайыннарар кыах баар. Айылҕа гааһыттан өрөспүүбүлүкэҕэ убатыллыбыт гаас оҥоһуллар. Бу аан дойду ырыынагар дьоһун миэстэни ылар. Бүгүҥҥү күҥҥэ маннык гаас тиэхинньикэ мотуоругар уонна хочуолунайдары, нэһилиэнньэлээх пуннары гаастааһыҥҥа сүрүн миэстэни ылан туһаныллар. Бэлиэтээн эттэххэ, 2021 сыл түмүгүнэн, өрөспүүбүлүкэҕэ уопсайа 17.1 мөл туонна ньиэп уонна 13.3 миллиард м3 айыл5а гааһа булуллубут.

Ульяна ЗАХАРОВА.

0
0
Telegram @edersaas20