Гаас ситимин тардыыга көмө улаатыаҕа

Бөлөххө киир:

Бэҕэһээ Ил Дархан Айсен Николаев салайан ыыппыт суһал ыстаап мунньаҕар өрөспүүбүлүкэ нэһилиэнньэтин социальнай гаастааһыҥҥа  улуустарга  тустаах оборудованиелар тиийэллэрин-тиийбэттэрин уонна  кыаммат  дьиэ кэргэн атыылаһалларыгар өйөбүлү оҥорор боппуруос көрүлүннэ.

«Социальнай гаастааһын бырагырааматын олоххо киллэрии нэһилиэнньэҕэ тыын суолталаах, ол иһин быйылгы былааны хайаан да олоххо киллэриэхтээхпит. Улахан үлэни Бырамыысыланнас, геология министиэристибэтэ  уонна «Сахатранснефтегаз» АУо оҥороллор, кинилэр эрэгийиэннээҕи оператор статуһун ылбыттара», — диэн Айсен Сергеевич быһаарар.

Ааспыт сылга социальнай гаастааһын саҕаланыаҕыттан 307 учаастакка диэри гаас ситимэ тардыллыбыт. Быйыл 2 тыһ. кэриҥэ учаастакка диэри «күөх төлөн» ситимэ тардыллыаҕа.

«Сахатранснефтегаз» АУо генеральнай дириэктэрэ  Алексей Колодезников быһаарбытынан, 137 км уһуннаах гаас ситимэ атын  сиртэн аҕалыллара былааннаммыт. Билигин хампаанньаҕа саппаас быһыытынан 24 км уонна бэдэрээтчиттэр ыскылааттарыгар 21 км уһуннаах ситим баар эбит.  Тэрилтэ  полимернай ситими туһаныыга көһөргө быһаарыныы ылыммыт, олору чуолаан, олохтоох  хампаанньаттан  —  «Эгопласт» ХЭУо-тан ылыахтара (Территориялары урутаан сайыннарыы резиденэ, ТОР). Ону тэҥэ, биллэр төрүөтүнэн сыана үрдээбитинэн сылтаан, “Сахатранснефтегаз» Арассыыйаҕа оҥоһуллубут  хочуоллары аҕалан туһаныаҕа.  Билиҥҥи туругунан 800 хочуол атыылаһыллыбыт.

Санатар буоллахха, социальнай гаастааһын бырагырааматынан  гаас ситимэ учаастакка диэри босхо тардыллар. Оттон учаастактан дьиэҕэ диэри хаһаайын үбүнэн оҥоһуллар.

Айсен Николаев бу күннэргэ  кыаммат уонна туспа категорияҕа киирсэр дьоҥҥо гаас ситимин тардыыга көмөнү оҥорууга эбии үбү буларга сорудахтаата. Билиҥҥи туругунан СӨ Үлэҕэ министиэристибэтиттэн  кыаммат ыалларга гааһы тардыыга 100 тыһ. солк көмө быһыытынан бэриллэр. Бу үп гааһы тардыы ороскуотун барытын саппат. Ол иһин 150 тыһ. солк диэри улаатыннарар сорук турда.

edersaas.ru

 

 

 

+1
0
+1
0
+1
0
+1
0
+1
0
+1
0
+1
0