Ааспыт нэдиэлэҕэ Санкт-Петербург куоракка алтынньы 3-8 күннэригэр аан дойдутааҕы ньиэп уонна гаас Х форума буолан ааста. Форум 2011 сылтан ыыталлар. Форумҥа гаас бырамыысыланнаһын бары салаатыттан эспиэрдэр, тас дойдулартан – Италияттан, Германияттан, Францияттан, Австрияттан, Словакияттан, Чехияттан, Боливияттан, Нигерия өрөспүүбүлүкэтиттэн тиийэ кытталлар, санааларын атастаһаллар, уопуттарын үллэстэллэр.
Форум туһунан СӨ бырамыысыланнаска уонна геологияҕа миниистирин 1-кы солбуйааччы Михаил Кириллин: “Ааспыт нэдиэлэҕэ ыытыллыбыт аан дойдутааҕы ньиэп уонна гаас Х форумугар Ил Дархан Айсен Николаев салайааччылаах дэлэгээссийэ таһаарыылаахтык кытынна. Форумҥа аан дойду үрдүнэн гаас бырамыысыланнаһыгар биллэр-көстөр хампаанньалар салайааччылара, бэрэстэбиитэллэрэ эспиэр быһыытынан үлэлээтилэр. Кинилэр айылҕа гааһын инники өттүгэр хайдах-туох туһанар туһунан дьүүллэстилэр, итиннэ сыһыаннаах араас хабааннаах бырайыактары иһиттилэр.
Тэрээһин биир суолталаах былаһааккатыгар – «Газпром газомоторное топливо” АУо тэрийбит пленарнай мунньаҕар Ил Дархан Айсен Николаев кытынна. Кини өрөспүүбүлүкэҕэ гааһы уматык быһыытынан туһаныы хайдах баран иһэрин, инники өттүгэр туох былаан баарын уонна туох көрүүлээҕин, толкуйдааҕын итэҕэтиилээхтик, ылыннарыылаахтык кэпсээтэ. Өрөспүүбүлүкэбитигэр гаас уматыгын сайыннарар инниттэн РФ Энэргиэтикэҕэ министиэристибэтин анал бырагырааматыгар киллэрэри туруоруста. Бырагыраамаҕа киирдэхпитинэ, өрөспүүбүлүкэҕэ тустаах субсидия көрүллүөҕэ. Ол иһигэр гаас уматыгын саппыраапкаларын тутуу киириэҕэ уонна гаас баллонун тимир көлөлөргө туруорууга субсидия көрүллүөҕэ.
Итини тэҥэ, «Газпром” АУо салалтатын кытта көрсөн, өрөспүүбүлүкэҕэ гаас уматыгын туһаныыны сайыннарыыттан саҕалаан, “Сибиир күүһэ” эбийиэктэриттэн Витимҥэ, Пеледуйга, Орто Наахараҕа, Чамчаҕа, Толооҥҥо диэри гаас ситимин тардыы бырайыагын оҥорор туһунан туруорустулар. РФ Бэрэсидьиэнэ Владимир Путин социальнай гаастааһыны эрэгийиэннэргэ ыытыҥ диэн этиитин чэрчитинэн, “Газпром” хампаанньа Саха сиригэр 5,8 млрд. солк. үбүнэн көмөлөһөрүн туһунан кэпсэтии барда”, — диэн санаатын үллэһиннэ.
Александр Тарасов, edersaas.ru