Киин ситимтэн гааһынан туһанар дьон сотору кэминэн дьиэлэригэр «өйдөөх счетчик» туруоралларын ирдиэхтэрэ. Маннык саҥа тэрил номнуо 2019 сыл кулун тутарыгар олоххо киириэхтээх. Ол туһунан вице-премьер Дмитрий Козак дьаһал таһаарбыт. Күөх уматыгы туһаныы иһин «өйдөөх учуокка» көһүү дойду үрдүнэн харчытыгар таһаардахха, нэһилиэнньэ 130 миллиард солкуобайы төлүөхтээх.
edersaas.ru
ИСУ – интеллектуальнай учуот ситимин киллэрэргэ вице-премьер Дмитрий Козак РФ Энергетикатын, Экэниэмикэтин министиэристибэтигэр уонна ФАС – федеральнай антимонопольнай сулууспаҕа сорудахтаабыт. Онон ким төһө гааһы туттубутун ааҕар тэрил сыыппаратынан төлүүр буолуохпут.
Уоту, гааһы туттуу кээмэйин ааҕар саҥа тэрили туруорарга бастакы этиини энергетиктэр киллэрбиттэр. Ол туһунан сокуон барылын 2017 сыл сэтинньитигэр Минэнерго Госдуумаҕа киллэрбитэ бастакы ааҕыыны ааспыта, сотору иккиһи, үсүһү эмиэ ааһар чинчилээх.
Элбэх кыбартыыралаах дьиэлэр саҥа счетчиктарын олохтоох «Энергосбыт» туруоруохтаах. Оттон гааһы туһаныы кээмэйин ааҕар биир тэрил сыаната ортотунан 5 000 солк., ону өссө уокка холбуохха наада. Ол төлөбүрүн нэһилиэнньэттэн хомуйуохтара, судаарыстыба үбүлүүр кыаҕа суох.
«Газпром» ааҕарынан, 2017 сылга Арассыыйаҕа гааһынан хааччыллыы 68,1% эбит, күөх уматык 25,6 мөлүйүөн дьиэҕэ киирбит. Онон гааһы туһаныы кээмэйин ааҕар тэрили туруордахха, 128 миллиард солкуобай киириэхтээх.
Маннык дьаһал уоту, гааһы харыстаан туттарга үөрэтиэҕэ, халтай ороскуоттанарын аҕыйатыаҕа диэн этэллэр.
Марианна ТЫРТЫКОВА, «Саха сирэ» хаһыат, edersaas.ru