Үгүс улуустар үүт туттарыытыгар былааннарын толорон иһэллэр

Быйыл өрөспүүбүлүкэ үрдүнэн бас билии көрүҥүттэн тутулуга суох 57 тыһ. 250 туонна үүт соҕотуопкаланыахтаах.

edersaas.ru.

Күн бүгүҥҥү туругунан, 18 тыһ. 172 туонна үүт туттарылынна, ити сыллааҕы былаан 30,7 %-а. Ханна даҕаны үлэ-хамнас көхтөөх, үгүс улуустар ыйдааҕы сорудахтарын толорон иһэллэр. Ордук үчүгэй көрдөрүүлээхтэринэн: Амма, Сунтаар, Мэҥэ Хаҥалас, Үөһээ Бүлүү, Дьааҥы, Өлүөхүмэ, Уус Алдан улуустара буолаллар.

Ол курдук, Мэҥэ Хаҥалас улууһа 1 396 т соҕотуопкалаата (сыллааҕы былаана 5880 т), Чурапчы – 1564 т (сыллааҕы былаана 5265 т), Сунтаар – 2127 т (сыллааҕы былаана 5265 т.), Амма – 1003 т (сыллааҕы былаана 4117 т), Таатта — 1221 т (сыллааҕы былаана 4230 т), Хаҥалас – 1540 т (сыллааҕы былаана 4601 т), Бүлүү – 1336 т ( сыллааҕы былаана 3852 т), Ньурба – 920 т (сыллааҕы былаана 3747 т), Уус Алдан – 601 (сыллааҕы былаана 2701 т), Өлүөхүмэ – 1136 т (сыллааҕы былаана 2401), Үөһээ Бүлүү – 563 т (сыллааҕы былаана 2781) туттаран иһэллэр.

Быйыл сүөһүттэн ылыллар бородууксуйаны астааһыҥҥа-таҥастааһыҥҥа, ол иһигэр үүт соҕотуопкатыгар 2,8 млрд солк субвенция көрүллүбүтүттэн, 53,4 %-а (1,5 млрд солк) өссө сыл бастакы кыбаарталыгар улуустарга ыытыллан турар. Кассовай былаан быһыытынан бу ый бүтүөр диэри үп 36,6 %-а барыаҕа, онтон ордубут 10 % балаҕан ыйыгар ыытыллыаҕа. Бу туһунан тыа хаһаайыстыбатын министиэристибэтэ иһитиннэрэр.

Раиса Сибирякова, «Саха сирэ» edersaas.ru.