Үгүлээт уота хайысхатын уларытта

Ааптар: 
Бөлөххө киир:

Атырдьах ыйын 4 күнүгэр Бүлүү улууһун Үгүлээт, Кыргыдай нэһилиэгин сирдэригэр умайа турар ойуур баһаардара тыал хайысхатын атын сиртэн ылан, балаһыанньа тосту уларыйда.

32 №-дээх ойуур баһаара Үгүлээтттэн ыраах сиргэ умайарынан авиазона хонтуруолугар киирэн, умулларыы үлэтэ тохтотуллубута.
Ол эрээри, эмискэ тыал уларыйбытыгар, уот хайысхатын тосту уларытан, баһаар иэнэ эмискэ кэҥээтэ уонна От Арыылаах диэн толоон сиринэн дэриэбинэҕэ чугаһыан сөп куттала үөскээбитэ. Ол иһин нэһилиэктэн 27 киһи баһаары умуруорууга мобилизацияланна. Ону кытта икки булууктаах тыраахтар, 3 массыына уоту умуруорууга таҕыстылар.
Бүгүн, атырдьах ыйын 5 күнүн, сарсыардатыгар Үгүлээт нэһилиэгин баһылыгын солбуйааччы Виктор Федоров улуустааҕы Суһал ыстааптан көмө көрдөөтө. Үөскээбит балаһыанньаны улуус баһылыгын бастакы солбуйааччы Иван Евсеев тута быһаарсан, «Сахатранснефтегаз” салалтатын кытта кэпсэтэн, биир дойдулаахпыт, Ил Түмэн дьокутаата Александр Гоголев көмөтүнэн Орто Түҥнээҕи гаас учаастагыттан улахан быһахтаах бульдозер көмөҕө барара быһаарылынна.
Итинник хабааннаахтык 27 №-дээх Кыргыдай сиригэр умайар уокка тыал хайысхата уларыйбытыгар, уот нэһилиэк диэки хайыста. Онон бу баһаарга Кыргыдайтан 11 киһи танкетканан таҕыста. Баһаар буола турар сиригэр ылбычча тиэхиньикэ тиийбэт уулаах-хаардаах, куталаах, бадарааннаах сиринэн танкетканан эрэ айаннаан, 10-ча чааһынан бу умайа турар сиргэ тиийэр кыах баар. Билигин бу уокка Бүлүүтээҕи авиалесоохрано 13 үлэһитэ үлэлии сылдьар. Балаҕаччы өттүттэн суолу-ииһи быһаара бэҕэһээ киэһэ тыраахтарынан дьон таҕыстылар.

Улуустааҕы суһал ыстааптан Андрей Яковлев-Чуос

+1
0
+1
0
+1
0
+1
0
+1
0
+1
0
+1
0