Тохсунньу 4 күнүгэр “Химки” футбольнай кулууп оонньооччута, дойду эдэрдэргэ хомуур хамаандатын хапытаана Артем Соколов дойдутугар кэлэ сылдьан, пресс-кэмпириэнсийэҕэ суруналыыстары кытары көрүстэ уонна оҕолорго маастар-кылааһы көрдөрдө диэн «Спорт Якутии» суруйар.
Дьокуускай куорат эдэр футболистара ааттаах-суоллаах биир дойдулаахтарын көрөн, олус үөрдүлэр. Автограф ылаары, хаартыскаҕа түһээри уһун уочарат субулунна. Хас хамсаныытын кыраҕытык көрөн-истэн, бу күн элбэххэ үөрэннилэр. Оҕолорго бу үтүө холобур, ситиһиилээх буоларга, үтүөҕэ тардыһарга дьулууру саҕар.
Артем Соколов кыра сылдьан Марха бөһүөлэгэр тренер Василий Ивочкин салайыытынан футболунан дьарыктанан саҕалаабыта. Кэнники сылларга эдэрдэргэ “Чертаново” хамаандаҕа оонньоон, бастыҥнар кэккэлэригэр сылдьыбыта, Арассыыйа хомуур хамаандатыгар кыттар этэ. Бу ааспыт сайын Соколову Арассыыйа премьер-лигатыгар оонньуур “Химки” кулууп ылбыта.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru