Саха сирэ Россия фундаментальнай чинчийиилэргэ пуондатын кытары саҥа сөбүлэһиини түһэристэ
Муус устар 20 күнүгэр Саха Өрөспүүбүлүкэтин Бырабыыталыстыбатын Бэрэссэдээтэлэ Евгений Чекин уонна Россия фундаментальнай чинчийиилэргэ пуондатын Сэбиэтин бэрэссэдээтэлэ Владислав Панченко саҥа сөбүлэһиигэ илии баттаатылар.
Сөбүлэһии 2018-2022 сс. өрөспүүбүлүкэҕэ фундаментальнай наукаларга чинчийиилэр куонкурустарын итиэннэ Россия уонна аан дойду таһымнаах научнай дьаһаллары тэрийэр бырайыактары олоххо киллэрэр кыаҕы биэриэҕэ.
– Россия фундаментальнай чинчийиилэргэ пуондатын миссията үрдүк. Кини биир сүрүн соруга эрэгийиэннэр социальнай-экономическай сайдыыларыгар туһуламмыт бастыҥ научнай бырайыактары өйөөһүн буолар, субъектары кытары холбоһуктаах кэнпириэнсийэ, икки өрүттээх сөбүлэһии киэбинэн үлэлиир. Сыллата биир тыһыынча бырайыагы үбүлүүр, — диэн бэлиэтээтэ Евгений Чекин.
Санатан эттэххэ, 2015—2017 сс. хабан үлэлээбит сөбүлэһии түмүгүнэн Саха сирин учуонайдарын геосфераҕа космос дьайыытын, сылыйыы, киһи доруобуйатын, Арктиканы чинчийиигэ, сир баайын, биологическай ресурсалары туһаныыга о.д.а. тиэмэлэргэ сыһыаннаах 500 ыстатыйалара дойду уонна аан дойду научнай таһаарыыларыгар бэчээттэммитэ. Быйылгы сылга холбоһуктаах куонкурус чэрчитинэн 40 научнай бырайыак үбүлэниэхтээх, онно анаан 16 мөл. солк. көрүлүннэ.
Раиса Сибирякова, Саха сирэ” хаһыат, edersaas.ru