СӨ Доруобуйа харыстабылыгар министиэристибэтэ, нэһилиэнньэ баҕатын учуоттаан, фтизиопедиатрдар кабинеттарын арыйар былааннаах.
Надежда ЕГОРОВА, «Саха сирэ» хаһыат, edersaas.ru
Министиэристибэ иһитиннэрэринэн, өрөспүүбүлүкэҕэ сэллигинэн ыалдьыы ааспыт сылы кытта тэҥнээтэххэ, 10 бырыһыанынан аҕыйах.
Ыам ыйын 23 күнүттэн Дьокуускай куоракка оҕо поликлиникаларыгар барыларыгар фтизиопедиатрдар кабинеттара аһыллыаҕа. Маннык кабинекка Манту, БЦЖ быһыылар түмүктэрэ сэрэхэдитэр эбэтэр БЦЖ ылбатах, ВИЧ-инфицированнай, иммуносупрессивнай терапияны ыла сылдьар, диспансеризация кэмигэр педиатр, эндокринолог, пульмонолог, нефролог быраастарга учуокка турар оҕолору кэтээн көрүөхтэрэ.
Манна сыһыаран эттэххэ, фтизиатрга учуокка турар, сэллигинэн ыалдьыбыт оҕолор медицинскэй чинчийиини сэллиги утары охсуһар диспансерга ааһыахтара.
х х х
Сэллиги сэрэтэр уонна эрдэттэн быһаарар туһуттан диспансеризацияны ааһар, сылга биирдэ флюорографияҕа түһэр, доруобуйаны куруук кэтээн көрөр наадатын эмчиттэр куруук санаталлар.
Ханнык баҕарар ыарыыга, ол иһигэр сэлликкэ, тириэрдиэн сөп төрүөттэринэн:
— стресс;
— депрессия;
— үлэҕэ сылайыы;
— арыгынан, табаҕынан сиэрэ суох үлүһүйүү;
— мөлтөх аһылык;
— элбэх киһи биир сиргэ түмсэн олоруута;
— ыалдьар дьону кытары алтыһыы уо.д.а. буолаллар.
Надежда ЕГОРОВА, «Саха сирэ» хаһыат, edersaas.ru