“СӨ Доруобуйа харыстабылын министиэристибэтэ 2018 сылга өрөспүүбүлүкэ медицинскэй тэрилтэлэрин ортолоругар куонкурус тэрийбитэ.
edersaas.ru
Куонкурус түмүгүнэн кыайыылааҕынан “Фтизиатрия” научнай-практическай киин таҕыста. Куонкуруска нэһилиэнньэ доруобуйатын бөҕөргөтүү, нэһилиэнньэҕэ сэрэтэр үлэни ыытыы, эдэр исписэлиистэри кытары үлэ, идэ таһымын үрдэтии, тэрилтэ ситиһиилэрэ уо.д.а. көрдөрүүлэр учуоттаннылар. Кэлэктиип бэйэни харыстаммакка үлэлээн уонна үлэни тэрийиигэ тиһиктээхтик ылсар буолан, сэллиги утары охсуһуу үлэтигэр дьоһуннаах миэстэни ылла.
Кыайыылаах тэрилтэҕэ СӨ доруобуйа харыстабылын миниистирэ Елена Борисова аатыттан “Бастыҥ медицинскэй тэрилтэ-2018” диплом уонна өйдөбүнньүк бэлэх туттарылынна.
Ону сэргэ Елена Борисова “Фтизиатрия” кииҥҥэ сылдьан эмчиттэр итиэннэ клинико-диагностическай лаборатория үлэлэрин билистэ. Үлэһиттэри, ыарыһахтары кытары көрсөн, балыыһаҕа эмтэнээччилэр тус санааларын интэриэһиргээн ыйыталаста.
Научнай-практическай киин салайааччыта Александр Кравченконы кытары кэлэктиип көрсөр кыһалҕаларын уонна инники былааннары, доруобуйа харыстабалын уопсай боппуруостарын дьүүллэстилэр.
ЫСПЫРААПКА:
“Фтизиатрия” 460 — суукканы быһа үлэлиир, 25 күнүскү куойкалардаах. Уопсайа үс: өрөспүүбүлүкэтээҕи, куораттааҕы уонна оҕо диспансернай отделениета үлэлиир. 800-тэн тахса үлэһит баарыттан быраастар 50-тан тахса бырыһыаннара үрдүк категориялаахтар.
Научнай-практическай кииҥҥэ доруобуйаны чинчийии аныгы ньымаларын: компьютернай рентгентомографическай диагностиканы, ВАСТЕС-960, ПЦР-систиэмэ, GeneXpert автоматизированнай систиэмэ көмөлөрүнэн бактериологическай диагностиканы уо.д.а. туһаналлар. ВИЧ-инфекциялаах ыарыһахтарга сэллиги утары көмөлөһөр кэбиниэт, “искусственнай бүөр” 2 аппарата бааллар. Киин торакальнай хирургияҕа, травматологияҕа уонна ортопедияҕа үрдүк технологиялаах медицинскэй көмөнү өрөспүүбүлүкэтээҕи уонна федеральнай квоталар суоттарыгар оҥорорго көҥүллээх.
“Фтизиатрия” килииникэтэ ХИФУ медицинскэй институтугар, Дьокуускайдааҕы базовой кэллиэскэ үөрэтэр, научнай уонна клиническэй базанан буолар. Киин өрөспүүбүлүкэҕэ соҕотох, 7506-тан тахса бэчээтинэй таһаарыылаах научнай-медицинскэй бибилэтиэкэтинэн киэҥ сураҕырар.
Надежда ЕГОРОВА, “Саха сирэ” edersaas.ru