Бүгүн, ыам ыйын 4 күнүгэр, «Фтизиатрия» научнай-практическай кииҥҥэ оҕо отделениетыгар оонньуур хос аһылынна. Саҥа хос «МейТан» компания «Биир олох» («Жизнь одна») аһымал бырайыагын чэрчитинэн олоххо арылынна. Бырайыак соругунан олох ыарахан түгэннэригэр түбэспит оҕолорго көмөлөһүү буолар.
edersaas.ru
Оҕолор хосторун үөрүүлээхтик аһыыга «Фтизиатрия» дириэктэрэ Александр Кравченко, «Мейтан» компания Дьокуускайдааҕы бизнес-киинин салайааччы Наталья Мегежекская биир идэлээхтэрин кытары кытыннылар.
Наталья Мегежекская: «Биһиги оҕо балыыһаларын отделениеларыгар кырачааннар эмтэнэллэрэ табыгастаах буоларыгар көмөлөһөбүт. Биллэрин курдук, үчүгэй иэйиилэр түргэнник үтүөрэргэ көмөлөһөллөр», – диэн эҕэрдэ тылын эттэ.
«Мейтан» хампаанньа оҕолорго анаммыт хоско олохтоох өрөмүөнү ыыппыта. Өрөмүөн бүппүтүн кэннэ ирдэбилгэ эппиэттиир аныгы миэбэллэри, 3-7 саастаах оҕолорго оонньуурдары атыыласпыттара.
«Фтизиатрия» НПК дьаһалтата уонна үлэһиттэрэ «МейТан» хампаанньаҕа махталларын биллэрдилэр.
Надежда ЕГОРОВА, «Саха сирэ» хаһыат, edersaas.ru