Егор Дегтярев 1941 сыллаахха Аҕа дойду Улуу сэриитигэр баран, пулемётнай взвод хамандыыра буолбута. Кини 1942 сыллаахха 26 эрэ сааһыгар Украинаҕа Балаклея куорат таһыгар эдэркээн олоҕун толук уурбута.
edersaas.ru
Егор Иванович суруйбут хоһооннорун аймахтара күн бүгүҥҥэ диэри харыстаан илдьэ сылдьабыт.
Бу “Кырдьаҕас уус” диэн хоһоонун 1938 сыллаахха тимир ууһа Константин Иванович Дегтяревка анаабыта.
“Күөрт үрэн бирилиир,
Көмөрө сирилиир,
Күөх уоттар көстөллөр,
Күөдьүйэ көтөллөр.
Кыһаттан — кыстыктан
Кыым уота ыһыллар,
Сириэһин уотуттан
Сирдиргии чаҕыллар.
Өрүтэ күөрэҥнээн,
Өтүйэ чабырҕас,
Уһун күн күннүктээн,
Уһанар кырдьаҕас.
Уулларар, уһаарар
Ыстаалы, тимири,
Ыпсаран таһаарар
От охсор тэрили.
Кырдьаҕас туйгун уус
Кыһата кытыастар,
Кыайыынын ыга куус,
Абаҕам барахсан!»
Онтон бу хоһоонун 1938-41 сыллар икки ардыларыгар суруйбут буолуон сөп.
“Эдэркээн уолчааны сүрэҕин долгутар
Этиэхтэн эриэккэс сибэкки тыллыбыт.
Хаарыаннаах үчүгэй хахыйах барахсан
Хампалаах күөҕүнэн айгырыы симэммит,
Сүрэҕи минньитэр сибиэһэй сытынан
Сөп-сөрүүн салгыны сабыта ибиирбит.
Тунаарар-унаарар чэлгийбит хатыҥнар
Тыал хоту нуоҕаһан бокулуон уурбуттар,
Көрүөхтэн сиэдэрэй нап-нарын лабаалар
Күөгэйэ-нусхайа долгуйа турбуттар.
Көй үрдүк халлааны кэрийэ эргийэн,
Күөрэгэй чыычааҕым көрүлүү туйаарбыт,
Кэрэ саас кэлиитэ үөрүүнэн дьиэрэйэн,
Кэскиллээх кэмнэри кэрэтик алҕаабыт.
Кэлэр да кэмнэргэ халдьаайы кырдалым
Кэрэкий өҥнөнөн киэркэйэ туруоҕа,
Көрүдьүөс куоластаах күөрэгэй чыычааҕым
Күөх сайын ийэни күндүтүк туойуоҕа».
Валентина КОМИССАРОВА, “Саха сирэ”, edersaas.ru сайтка анаан