«Долгожданный треугольник» бырайыак чэрчитин, 1941-1945 сыллардаахха, уоттаах сэрии толоонуттан кэлбит суруктары дорҕоонноохтуук ааҕыы бырайыага түмүктэннэ.
Санатан эттэххэ, бу туһунан А.Е.Кулаковскай аатынан норуоттар доҕордоһууларын дьиэтин пресс-сулууспа иһитиннэрэн турар. Куйаар ситиминэн ыытыллыбыт бырайыак кыттыылаахтарыгар «Сюрприз» үҥкүү норуодунай ансаамбыла махтанан туран электроннай сэртипикээттэри тиэрдэр.
Пресс-сулууспаттан Махтал суруктар коронавирус дьаҥа аастаҕына, үөрүүлээх быһыыга-майгыга туттарыллыахтара диэн иһитиннэрэллэр. Бырайыакка барыта 114 киһи кыттыбыт. Саамай эдэр кыттааччы 4 саастаах, оттон саамай аҕам саастаах кыттааччы — 81. Бэлиэтээбиттэринэн, бырайыакка оҕолор, төрөппүттэр, уһуйааннар иитээччилэрэ, устуудьуйалар кэлэктиибинэн көхтөөхтүк кыттыбыттар. Маныаха элбэх сурук Калугаттан, Санкт-Петербуртан, Хабаровскайтан, Лесозаводскайтан уонна, биллэн турар, Дьокуускайтан киирбит.
Бырайыак суругу суруйуу (үс муннук сурук), суругу видеонан тиэрдии, итиэннэ бэтэрээннэргэ видеонан эҕэрдэ диэн түһүмэхтэринэн ыытыллыбыт. Тэрээһин дьону сомоҕолообут. Бу туһунан «Сюрприз» педагогтара тоһоҕолоон бэлиэтээбиттэр. Видеороликтары Андрей Пойда монтажтаабыт, сэртипикээттэри уонна бэтэрээннэргэ Махтал суруктар макеттарын Айтал Коркин оҥорбут, бырайыак эрэдээктэринэн А.Е.Кулаковскай аатынан норуоттар доҕордоһууларын дьиэтин генеральнай дириэктэрин солбуйааччы Розалия Колосова үлэлээбит.
