Бүгүн күнүс эбиэт саҕана француз экстремал-туриһа Ив Шалуан бэлисипиэтинэн Өймөкөөн улууһун Томтор нэһилиэгэр тиийдэ.
edersaas.ru
Ив Шалуан соторутааҕыта урбаанньыт Иван Заболоцкай туппут толору хааччыллыылаах гостиницатыгар түспүт.
Бу суруйар кэммэр Томторго сибээс суох буолан, ыалдьыттар түһэр дьиэлэрин хаһаайынын кытта батсаабынан суруйсан кэпсэттим.
— Экстремал-турист Хаандыгаттан 8 күн айаннаан кэлбит. Күҥҥэ 50 км барар эбит. Хараҥардаҕына айанын тохтотон, балааккаҕа хонор эбит, — диэн кэпсиир Иван Заболоцкай. Биһиги кэпсэтэр кэммитигэр Ив сылайан утуйа сытар кэмэ этэ. Кэлээт, эбиэттээн баран, утуйан хаалбыт.
— Наһаа сылайбыт этэ. Утуйан туран саунаҕа бааньыктаныаҕа. Ол кэннэ кэпсэтээр, — диэн суруйбута Иван. Хомойуох иһин, французтуун киэһэ кэпсэтэр эмиэ кыаллыбата. Сибээс суоҕун курдук суох. Онон Иван Заболоцкайдыын салгыы эмиэ батсаабынан кэпсэттибит.
— Хайалаах сирдэри хайдах дабайбытый? Халтараана сүрдээх буолуо? — диэн ыйыппыппар сэһэргэһээччим:
— Дьиҥ туруору хайалаах сирдэри хааман тахсар эбит. Ол эрээри сорох сиргэ трассаны тибэн, хаардаах сиргэ бэлисипиэккэ ыарахан үһү. Үчүгэй күн-дьыл туран абыраабыт. -40 кыраадыска айанныыр үчүгэй эбит диир, — диэн суруйда.
Иван Заболоцкай соторутааҕыта суунан-тараанан, сынньаммыт көрүҥнээх ыалдьытын хаартыскатын ыытта. Ив Шалуан бэркэ сэргэхсийбит көрүҥнээх. Буолумуна, сыалын ситтэ да ситтэ! Иван толору хааччыллыылаах гостиницатын француз олус сөбүлээбит үһү.
Иван ыалдьыттара киэһэ аһылыктарын аһыы олорон, былааннарын кэпсэтэ олордохторуна түһэрэн ыытта. Ив «Халыма» трассатынан айаннаан истэҕинэ кэргэнэ кини иннигэр массыынанан айаннаан испит.
Сарсын француз туриһа Өймөкөөн нэһилиэгэр айанныаҕа. Аан дойдуга аатырбыт Тымныы оҕуһун стелатын аттыгар тиийэн, хайаан да хаартыскаҕа түһүөн наада буоллаҕа. Оччотугар эрэ экстремал-турист Ив Шалуан Тымныы полюһугар сылдьыбытынан ааҕыллара чахчы.
Елена ПОТОЦКАЯ, «Саха сирэ» хаһыат, edersaas.ru
Хаартыска — Иван Заболоцкай архыыбыттан.