Бу күннэргэ Саха сирин олохтоохторо аны француз велосипедиһа, блогер Ив Чалоин Тымныы полюһугар Өймөкөөҥҥө айанын кэтээн көрөбүт.
Тоҕо «аны» диир буоллахпытына, былырыын бэлисипиэттээх кытай туриһа Ча Эрдаан Өймөкөөҥҥө айаннаабытын Саха сирэ бүттүүнэ кэтии, истэ-билэ олорбута. Киһибит Томпоҕо тиийэн, көлөтө алдьанан, салгыы айанныыртан аккаастанан төннүбүтэ. Дьэ, онон аны француз экстремал-велосипедиһа тымныы полюһугар бэлисипиэтинэн айаннаан эрэр!
Үгүс ааҕааччым: «Бэлисипиэтинэн айанныыр экстремал-туристар тымныы полюһугар — Өймөкөөҥҥө айаннарын салҕаан, сериалгын суруйууй» диэн көрдөһүүлэрин ылынан: «Хантан ол французпун булабыный?» — диэн саныы олордохпуна, билбэт нүөмэрбиттэн эмискэ: «Француһу Томполуур суолга көрсүбүттэр. Видеота бу баар. Кытаат, сонунна суруй!» — диэн батсаапка сурук кэллэ. Дьэ, Ороһуоспа дьиктитэ диэн бу буоллаҕа!
Видеоны аймаҕар эбээн аатырбыт ырыаһыта, саха эстрадатын чаҕылхай сулуһа Дмитрий Лебедев ыыппыт. Кини Томпо Тополинайыгар кэнсиэрдии баран иһэн, били, французпутугар кэтиллэ түспүт. Барахсан, бэлисипиэтин көлүөһэтэ алдьанан, ону өрөмүөннэммитэ буола сылдьаахтыыр эбит.
— Чөркөөххө билэр дьоммор хааллара сатаабыппын, олох буолуммата. «Кафеҕа хаалыам» диэхтиир. Таҥаһа чарааһа сүрдээх. Нууччалыы кыратык билэр эбит. Мин, ыксаан иһэр киһи, туриһы Таатта улууһун биир кафетыгар киллэрээт, салгыы айанныы турдаҕым дии,— диэн кэпсиир Дмитрий Лебедев.
Дьэ, онон, доҕоттор, француз экстремал-туриһын, аатырбыт блогер Ив Чалоины кытта Тымныы полюһугар «айаммытын» саҕалыаҕыҥ. Кини — «Халыма» федеральнай трасса устун тохсунньу тымныытыгар бэлисипиэтинэн айанныыр, биһиги — «Эдэр саас» саайты кэтии олорон, «виртуальнай суолунан айанныыбыт»!
Айаммыт саҕаланна!
Елена ПОТОЦКАЯ, «Саха сирэ» хаһыат, edersaas.ru