Нам улууһугар ыытыллыбыт Олоҥхо ыһыаҕар ыраахтан-чугастан үгүс ыалдьыт тоҕуоруста.
edersaas.ru
Кинилэр ортолоругар Францияттан Гавр университетын профессордара эмиэ бааллар.
Гавр университетын Бочуоттаах бэрэсидьиэнэ, профессор, экэнэмиичэскэй наука доктора Пьер-Брюно Руффини кэллиэгэтинээн профессор Эрик Райнодтуун уоппускаларын кэмигэр Саха сиригэр ыалдьыттыы кэлэ сылдьаллар. Кинилэр бэс ыйыгар саха норуота ыһыах ыһар үгэһин уруккуттан билэллэр эбит.
— Биһиги Франция аатырбыт киинэ документалиһа, режиссера Крис Маркер Сибиир туһунан документальнай киинэлэригэр саха норуотун национальнай бырааһынньыгын — ыһыах туһунан устуутун көрбүппүт. Онон саха киһитэ итэҕэл үгэһин тутуһан, сайыны көрсөр, уруйдуур ыһыах ыһар кэмин туһунан истэн-көрөн билэбит. Билигин ыһыаҕы, этнографическай ис хоһоонноох тутуу эбийиэктэрин бэйэбит харахпытынан илэ көрөн, хаһан да истибэтэх бэрт дьикти эпическэй айымньыны — олоҥхону кыралыын-улаханныын толороллорун истэн олуһун сөхтүбүт. Хаһан да этническэй норуот бэйэтин үгэһин, култууратын, абыычайын тутуһарын көрө илик буолан, барытын дууһабытыгар олус истиҥник ылынныбыт. Туос Ураһаны, Аал Луук Маһы эргийэ сылдьан көрдүбүт, үөрэттибит. Киһи барыта саха национальнай көстүүмүн кэтэ сылдьара наһаа сонун көстүү. Ол аата, бу омук өбүгэ саҕаттан силистээх-мутуктаах норуот диэн санааҕа кэлэҕин, — диэн санаатын үллэстэр экэнэмиичэскэй наука доктора Пьер-Брюно Руффини.
Оттон профессор Эрик Райнод саха аһын амсайан, олус астыммытын бэлиэтиир:
— Биһиги манна кэлиэхпит иннинэ кэллиэгэлэрбит, ХИФУ преподавателлэрэ Олоҥхо ыһыаҕын туһунан билиһиннэрбиттэрэ. Ол эрээри, бэйэҕинэн кэлэн көрөн-истэн, национальнай аһы амсайарыҥ олох атын! Мин саламааты, күөрчэхтээх алаадьыны уонна тоҥ чыыртан салааты олус сөбүлээтим.
Бу күннэргэ Францияттан кэлбит ыалдьыттар Өлүөнэ очуостарыгар тиийэ устан кэлэр уонна мусуойдарга сылдьан Саха сирин туһунан сиһилии билсэр былааннаахтар.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.