Кулун тутар 23 күнүгэр, Франция соҕуруутугар турар кыра Треб куорат супермаркетыгар сэрии сэбиргэллээх киһи дьону билиэн ылбыт. Франция бырабыыталыстыбата быһылааны терракт диэн билиннэ.
Спецназ байыастара штурмалаан билиэн түбэспит дьону босхолообуттар, террорист үс билиэннэйэ өлөрбүт уонна спецназ байыастарын кытта ытыалаһыыга өлбүт. Кини Мароккоттан төрүттээх «ИГИЛ» террористар түмсүүлэрин чилиэнэ буолара биллибит.
Террорист бастаан Каркассон куоракка полиция үлэһиттэрин ытыалаабыт. Биир киһини эчэтэн баран «ИГИЛ» чиэһин көмүскүү сылдьабын диэн хаһыытаабыт. Онтон «Опель» массыына хаһаайынын өлөрөн баран кини массыынатынан супермаркекка айаннаабыт.
Маҕаһыын таһыгар сылдьыбыт дьон саа тыаһын истибиттэр. Террорист саалаах, быһахтаах уонна гранаталаах сылдьыбыт. Террориһы кытта спецназ сибээскэ тахсыбытыгар, кини Парижка 130 киһини өлөрбүт террориһы — Салах Абдесламы босхолооҥ диэбит. Сотору кэминэн кини суута буолуохтаах. Спецназ штурмалаан террориһы суорума суоллаппыт. Уопсайа 3 киһи өлбүт, 2 киһи эчэйбит.
Санатан эттэххэ, ааспыт сылга Франция полицията 17 террагы тохтоппут. Оттон быйыл икки террагы.
Николай Попов, «Саха сирэ» хаһыат, edersaas.ru