Франция 39 саастаах бэрэсидьиэнин 64 саастаах ойоҕор болҕомто кытаанаҕа!
Бернадетт Ширак, Сесилия Саркози, Карла Бруни, Валери Триервейлер… Бу дьахталлар бары Франция бэрэсидьиэннэрин ойохторо буолалларын арааспанньалара эрэ бигэргэтэр.
Елена ПОТОЦКАЯ, «Саха сирэ» хаһыат, https://edersaas.ru
Оттон бу күннэргэ Франция саҥа бэрэсидьиэнэ Эмманюэль Макрон бэйэтин аатынааҕар ордук кэргэнин Бриджит Макрон аата элбэхтэ иһиллэр буолла. Биир үксүн, аан дойдуга ол да иһин үгүс киһи саҥа бэрэсидьиэҥҥэ болҕомтотун хатаата. Тоҕо интэриниэт эйгэтигэр бу дьиэ кэргэн олоҕо араастаан ырытыллар буолла?
64 саастаах Брижит 39 саастаах кэргэнэ Эмманюэль чааһынай олохторун хасыһыы былырыын сэтинньи ыйга Францияҕа тас көрүҥүнэн да, өйүнэн-мэйиитинэн да биир саамай биллэр-көстөр кыахтаах эдэр бэлиитик Эмманюэль Макрон бэрэсидьиэн дуоһунаһыгар киирсэрин туһунан биллэриититтэн саҕаламмыта. “Голливуд мичээрдээх”, үгүс дьахтар кутун туппут эдэр киһи үөрэппит учууталын Бриджит Троньены кытта 10 сыл бииргэ олороллоро биллэн, дьону улаханнык соһуппуттар. Франция саҥа бэрэсидьиэнэ бэйэтин оҕолорун буолбакка, Тронье сэттэ сиэнин көрсөр-харайсар эбит. “39-таах Эмманюэль Макрон билигин да, киниттэн 24 сыл аҕа уһун атахтаах блондинка кэргэнин кууһа, сыллыы сылдьарын үгүс эдэр дьахтар ымсыыра көрөн хаалар”, — диэн интэриниэккэ суруйаллар.
“Таптал сааһы билиммэт” диэн өйдөбүл туоһулара Бриджит уонна Эмманюэль ыраас истиҥ тапталлара ханна уонна хаһан кулуһуннуу умайбытай?
Оскуолаҕа үөрэнэ сылдьан төһөлөөх уол эдэркээн учууталын кистии-саба сөбүлүү көрбүтэ буолуой? Бу «платоническай» дэнэр таптал оҕо саас мааны өйдөбүлэ буолан, сотору кэминэн умнуллан хаалара чахчы. Woman.ru интэриниэт-таһаарыы суруйарынан, Эмманюэль Макрон аан бастаан Бриджит Озьер (дьахтар бастакы кэргэнин араспаанньата) диэн ааттаах учууталы бастакы көрүүттэн сөбүлээбит. Оччолорго Бриджит французскай литература предметин христианскай религиознай оскуолаҕа биэрэр эбит. Ол кэмҥэ дьахтар 40 саастааҕа, кэргэннээҕэ, Макрон саастыы үс оҕолооҕо. Дьоллоох дьиэ кэргэн ийэтэ Амьен куорат саамай баай сис ыалыттан төрүттээх буолан, бары өттүнэн кыахтаах эбит. Кини аҕата — сыллааҕы дохуота 4 мөл. евроҕа тэҥнэһэр сакалаат фабрикатын бас билэр бэһис көлүөнэ бэрэстэбиитэлэ. Оттон Эмманюэль, профессордар оҕолоро, учуутал дьахтары көрсөрүгэр 15 саастаах обургу уол 10 кылааска үөрэнэрэ. Бастаан утаа уол учууталын кистии-саба, уора-көстө таптыыр эбит. Онтон сыыйа үөрэҕэр кыахтаах уонна толкуйдаах уол учууталын болҕомтотун тардан барбыт. Бриджит сотору кэминэн театральнай кылааһы арыйбыт. Эммануэль ол кылааска көспүт. Учууталын кытта сценарий суруйан баран, кылаабынай оруолу толорбут. “Хас бээтинсэ аайы пьесабытын чочуйаары көрсөр буолбуппут. Сотору кэминэн биһиги бэйэ-бэйэбитигэр ис-иһиттэн тардыһар буолбуппутун өйдөөбүппүт”, — диэн Бриджит Тронье Paris Match диэн интэриниэт-таһаарыыга тус олоҕун кэпсииригэр билиммит. Учуутал уонна обургу уол сотору кэминэн тапталларын кимтэн да кистээбэт буолбуттар. Бу туһунан төрөппүттэрэ билэн баран, уолларын куораттан көһөрөн, Париж куоракка үөрэттэрэ ыыппыттар. Тапталлаахтар бүтэһик көрсүһүүлэригэр. Эмманюэль хайаан да төннүөҕүн уонна Бриджити кэргэн ылыаҕын туһунан эрэннэрбит. Онуоха учуутал дьахтар сонньуйаат: “Эн миигин сотору кэминэн умнуоҕуҥ”, — диэбит. Уол тылыгар турбут, үөрэҕин бүтэрээт, учууталыгар төннүбүт. Бриджит оҕолоро эдэр “аҕаларын” бастаан сөбүлээбэккэ, тапталлаахтары араара сатаабыттар эрээри, Эмманюэль бэйэтин саастыылаахтара буолан, кинилэри кытта кэлин уопсай тылы булбут.
2007 сыллаахха Эмманюэль Макрон уонна Бриджит Тронье сыбаайбалаан, олохторун холбообуттар. Кинилэр өргө диэри эрдээх ойох буолалларын киэҥ араҥаҕа биллэрбэккэ сылдьыбыттар. Арай 2014 сыллаахха Макрон Францияҕа үп миниистиринэн ананаат, бэйэтин тапталлаах кэргэнин публикаҕа билиһиннэрбитигэр, аан бастаан бу ураты паара дьон хараҕын далыгар киирбит. Атын судаарыстыбаннай деятеллэргэ тэҥнээтэххэ, Макрон кэргэнигэр ыраас иэйиитин өрүү биллэрэн, сыллыы-ууруу сылдьарын үгүс папарацци таба көрөн, хаартыскаҕа үгүстүк түһэрэн, дьон билиитигэр таһаарар эбит. Онон кинилэр сиэттиһэн баран хаамсар хаартыскалара — Франция сыаналаах глянцевай сурунаалларын киэргэллэрэ.
Билигин Эмманюэль бэлиитикэнэн утумнаахтык үлүһүйэр кэмигэр кини таптыыр дьахтара уруккутун курдук учууталлыыр. Бриджит эрэ бэрэсидьиэн быыбарыгар анньыһарыгар олус улахан оруоллааҕа. Тыл үөрэхтээҕэ буолан, быыбар матырыйааллара, кэргэнин туһунан ыстатыйалар барыта кини илиитин иһинэн ааһаллара. Инньэ гынан, бэлиитик публичнай уобараһа таптыыр дьахтар көрүүтүнэн арыллыбыта. Биллэн турар, бэлиитик имиджин өйдөөх дьахтар кини бэйэтин аттыгар сылдьан чочуйбут буолан, Эмманюэль: “Мин быыбарга кыайар түгэммэр, кэргэним хаһан да иккис оруолга сылдьыа суоҕа. Аан дойду барыта Франция бастакы ледитин аатын дорҕоонноохтук ааттыаҕа. Бриджит сүбэтэ миэхэ өрүү туһалыыр. Кини эрэ аттыбар баара миигин уоскутар, — диэн бэлиитик RTL телеканалга быыбар кэмигэр санаатын аһаҕастык этэн турар.
Ыам ыйын 7 күнүгэр Эмманюэль Макрон Франция бэрэсидьиэнин быыбарыгар кыайбыта. Кылгас кэм иһигэр кини дьиэ кэргэнигэр ордук улахан болҕомто ууруллубутунан, тапталлаах кэргэнин көмүскэһэр сыалтан, Le Parisien таһаарыыга аһаҕас интервью биэрэргэ күһэлиннэ.
— Өскө мин кэргэммиттэн 20 сыл аҕа эбитим буоллар, биһиги сааспытынан сөп түбэһэрбит-түбэспэппит, дьон хараҕар хайдах көстөрбүт кими да долгутуо суоҕа этэ. Араас саҥа-иҥэ мин кэргэним сааһыттан иҥиннэ. Бэйэбин араастаан киртитэр сурах тарҕанна, — диэн кэпсэтиини саҕалаата бэрэсидьиэн. Быыбар түмүктэммитин кэннэ социальнай ситимнэргэ Эмманюэль Макрон ориентациятын баһааҕырдар сурахтар тарҕаммыттара. Кини Бриджити гомосексуалист буоларын кистэлгэ тутаары туһанар диэн. Эмманюэль Макрон бу интервьютугар, сүрүннээн, кэргэнин көмүскүүр соруктаах эттэ-тыынна.
Ол эрээри үгүс иһитиннэрэр-биллэрэр биэриилэр Бриджит Макрону бэрэсидьиэн кэргэнин быһыытынан буолбакка, сааһырбыт дьахтар хайдах тутта-хапта сылдьарыгар, тас көрүҥэр болҕомтолорун туһаайдылар. Ол курдук, ордук Woman.ru интэриниэт-таһаарыы “күннээтэ”.
Бастакынан Бриджит айылҕаттан бэриллибит уһун көнө атаҕар болҕомто уурулунна. Бу, арааһа, 64 саастаах дьахтар этиттэн-сииниттэн саамай биһирэнэр өрүтэ. Бриджит “сирэйигэр олох барсыбат загара уонна сырдык баттаҕа” – саамай кириитикэлэнэр өттө. “Французскай шиккэ” эппиэттээбэт үһү. Этин толору ыла сылдьар джинсы бүрүүкэ, уһун жакет уонна ботильон – Бриджит имиджэ. Арааһа, бу таҥаһа кинини эдэрситэн көрдөрөрүттэн оннук таҥнара дуу…
Франция саҥа бэрэсидьиэнин ойоҕо өрүү “Capucines от Louis Vuitton” суумканы иилинэ сылдьар, бэйэтиттэн олох араарбат эбит. Биллиилээх муода экспердэрэ бэлиэтииллэринэн, Бриджит Макрон Эмиэрикэ бастакы ледитэ Мелания Трампы кытта тэҥнэһиэ ыраах эрээри, бэйэтин суолун историяҕа номнуо солоон эрэр.
Аны аҕыйах хонугунан 64 саастаах дьахтары тыҥааһыннаах түгэн күүтэр – ыам ыйын 14 күнүгэр Эмманюэль Макрон инаугурацията буолар. Онно, биллэн туран, сүрүн болҕомто сыл аҥаарын быһа ырытыллыбыт, бэйэтин тула мөккүөрү тарпыт Бриджит Макрон тас көрүҥэр ууруллуоҕа. Бу күннэргэ Франция модельердарын интэриэстэрэ улаатта – Бриджит суолталаах бырааһынньыкка кимиэхэ былаачыйатын сакаастыыр: сөбүлүүр Louis Vuitton фирматыгар дуу, Christian Dior талар дуу?
Ээ, баҕар, бэйэтин этиттэн араарбат хара тирии бүрүүкэтин кэттэҕинэ да көҥүлэ! Бу туһунан олох сотору — өрөбүл күн билиэхпит.
Елена ПОТОЦКАЯ, «Саха сирэ» хаһыат, https://edersaas.ru
Хаартыскалары интэриниэттэн туһанным.